කේතු

ග්‍රහයන් නව දෙනා අතරින් නවවැනි ග්‍රහයා කේතුය. හේ ඡායා ග්‍රහයෙකු වශයෙන් ද රාහුගේ ශරීරය හෝ වාලධිය වශයෙන් ද සලකනු ලැබේ. සූර්ය චන්ද්‍ර දෙදෙනාගේ කක්ෂ එකට හමු වන දකුණු සන්ධියට කේතු යන නම ව්‍යවහාර කරන බව ‘විදි විලක්කම්’ නමැති ද්‍රවිඩ ග්‍රන්ථයෙහි දැක්වේ. ජ්‍යෙතිශ්ශාස්ත්‍රයෙහි දැක්වෙන පරිදි කේතුට දුම් පැහැය ඇති භයංකර සිරුරක් ඇත්තේය. සිදුරු සහිත ගෙවල්, වස්ත්‍ර, වස, විෂ, තුඹස්, නීල මාණික්‍යාදිය කේතුට හිමිය. රවි, සඳු, කුජ යන ග්‍රහයන් තිදෙන ඔහුට මිතුරුය. කිවි, ශනි දෙදෙන සතුරුය. ගුරු, බුධ යන දෙදෙන සමයි. ධනු රාශියේ අංශක 20ක් පරමෝච්චයි. මිථුනයේ අංශක 20ක් පරම නීචයි. සිංහය මූල ත්‍රිකෝණයි. මීනය ස්වක්ෂේත්‍රයි. පරාශරාදීන්ගේ මත අනුව කේතු නමින් ග්‍රහයන් (වල්ගා තරු) 101ක් ඇති බව ද ගර්ගාදීන්ගේ මත අනුව 1,000ක් ඇති බව ද දැක්වේ. මේ සියල්ල ම එක ම කේතු ග්‍රහයාගේ බහුරූප යයි නාරද සෘෂිවරයා පවසයි. මේ හැම කේතු ග්‍රහයකුගෙන් ම ලෝකයාට ශුභාශුභ ඇති වන බව දැක්වේ.

ඩී. ආර්. සෙනෙවිරත්න