"ඔංචිල්ලාව" හි සංශෝධන අතර වෙනස්කම්

18:54, 19 සැප්තැම්බර් 2017 වන විට නවතම සංශෝධනය

සාමාන්‍යයෙන් කඹයක දෙකෙළවර උඩක ගැටගසා සවිකොට එහි එල්ලා වැටෙන නැම්මෙහි ලෑල්ලක් හෝ කොට්ටයක් වැනි යමක් තබා කෙනෙකුට හිඳගෙන පැද්ද හැකි ආකාරයට සාදාගන්නා විනෝද උපකරණය ඔංචිල්ලාව නමි. ඔංචිල්ලා වර්ග කීපය අතුරින් සරලතම වර්ගය වූ මෙය ලණු (වැල්) ඔංචිල්ලාව යනුවෙන් වෙසෙසා හැඳින්වේ. බඹර ඔංචිල්ලා සහ කතුරු (යතුරු) ඔංචිල්ලා නමින් තව ප්‍රධාන වර්ග දෙකකි.

ලණු (වැල්) ඔංචිල්ලාව:

දික් රැහැනක දෙකොන රියනක් පමණ පරතරය තබා ඉහළ ගැට ගැසීමෙන් බිම අසලින් එල්ලා වැටෙන්නට සලසා ලූ පොට ලණු ඔංචිල්ලාවයි. ඉඳගැනීමේ හෝ සිට ගැනීමේ පහසුව සඳහා ලෑලි කෑල්ලක්, පොල්පිති කෑල්ලක් වැනි ආධාරකයක් සමහරවිට ඔංචිල්ලාවට යොදනු ලැබේ. රුකුලු ගෙන පදින්නට දන්නා අය බොහෝ ඉහළට පැද යා හෙන දික් ඔංචිල්ලා පැදීමට කැමැත්තාහ. මොවුන් තවකෙකු හිඳුවා ගෙන ද පඳිනු පෙනේ. රුකුලු ගනිමින් පදින්නට දන්නා දෙදෙනකු ඔංචිල්ලාවෙහි මුහුණට මුහුණ ලා සිටගෙන මාරුවෙන් මාරුවට රුකුලු ගනිමින් බලාසිටින්නන් ලොමුදහගන්වන සැටියේ ඉතා ඉහළ පැදයන අවස්ථා ද වෙයි. මෙබඳු ඔංචිල්ලා බැඳෙන්නේ සාමාන්‍යයෙන් සිංහල අවුරුදු කාලයෙහිය; බොහෝදෙන පහසුවෙන් ඇදී එන එළිමහන් තැනක පිහිටි උස් ගසකය. මේ ඔංචිල්ලා පිණිස සාමාන්‍යයෙන් යෙදෙන්නේ කඹ හෝ කල, කිරිඳි වැනි සවිමත් වැල්ය. වැල්වලින් ද බැඳගන්නා නිසා මේ වර්ගයේ ඔංචිල්ලා වැල් ඔංචිල්ලා නමින් ද හැඳින්වේ.

බඹර ඔංචිල්ලාව:

ලෑල්ලක දෙකෙළවර එල්ලෙන ඔංචිල්ලා දෙකකින් යුත් මෙය පෙනීමෙන් කණුවක් මත තැබුණු කදක් වැන්න. පැදවීමේ දී ඔංචිල්ලා දෙක එල්ලුණු ආධාරකය වාඩි ගෙන සිටින දෙදෙනාත් සමඟ කණුව වටා කැරකී යන්නේ ය. පැදවීම කැරෙන්නේ අනිකකු විසිනි. කැරකීයාම නිසා මේ ඔංචිල්ලාවට බඹර ඔංචිල්ලාව යයි කියත්. අඩි 10ක් පමණ උසැතිව සිටුවා ගත් කණුවක මුදුනෙහි කළ වටකුරු කුඩුම්බියක අඩි 10ක් පමණ දිගත් අඟල් 6ක් පමණ පළලත් ඇති යතුගෑ කිතුල් ලෑල්ලක් බුරුලට බැස්සීමෙන් එය සාදාගැනේ. සමබර දෙදෙනකු ඔංචිල්ලා දෙකෙහි ඉඳගත් පසු කණුවටත් ඔංචිල්ලාවටත් අතරින් එලී සිටින බාන් පොට කණුව වටා ගනිමින් අනෙකෙක් ලෑල්ල බමන්නට සලස්සයි. එවිට ඔංචිල්ලා දෙක ඉඳගෙන සිටින දෙදෙනාත් ගෙන වේගයෙන් බමන්නට පටන් ගනී. ඔංචිල්ලා දෙකත් පදවන බහනත් එල්ලා ගන්නේ ලෑල්ලෙහි ඒ පිණිස විද ඇති සිදුරු තුළින් ඇදගත් බාන් කෙළවර මහත් ගැටයක් බැගින් ලීමෙනි. සිටගෙන පැදීමක්, රුකුලු ගැනීමක් හෝ පස්සට පැදී ඊමක් එහි නැත.

කතුර (යතුරු) ඔංචිල්ලාව:

සාමාන්‍යයෙන් අට බැගින් වූ ඔංචිල්ලා දෙපෙළක් රියසක් දෙකක් මෙන් ගුවනෙහි කැරකෙන්නට සාදාගනු ලබන යන්ත්‍රයෙකි. එය සාමාන්‍යයෙන් සාදාගැනෙන්නේ බොහෝදෙන එකතුව විනෝදවන සිංහල අවුරුදු දිනයෙහි විනෝදවනු සඳහාය. කතුරු ඔංචිල්ලාවක් සාදාගැනීමට ගමක වැසියන්ගේ සහයෝගයත් බොහෝ දෙනකුන්ගේ කීප දවසක මහන්සියත් සමඟ වියදමක් ද ඕනෑ කෙරේ.

අඩි 10ක් පමණ උසින් බැඳි කතිර දෙකක් මත අඩි 12ක් පමණ දිග ඒරිය කඳක් වැනි කඳක් යොදා ගැනීමෙන් ඔංචිල්ලාව සෑදීමේ කටයුතු ඇරඹේ. ඉන්පසු කඳ දෙකොනේ කතිර දෙකට ඇතුළතින් අඩි 2ක පමණ පරතරය සිටින්නට කතිර පේළි දෙකක් බැගින් බැඳගන්නේය. මේ එක් එක් කතිර පෙළ ගරාදි අටකින් සැදි රියසකක් වැන්න. එක් කතිර පෙළක ලීකොන් අටත් ඊළඟ පෙළේ ලීකොන් අටත් අතර හරස් පොල්ලක් බැගින් වෙයි. ඔංචිල්ලා එලෙන්නේ එහි සිටය. එබැවින් එක් පැත්තක ඔංචිල්ලා අටක් ද අනෙක් පැත්තේ ඔංචිල්ලා අටක් ද වන්නේය. දෙපසෙහි ඔංචිල්ලා දෙපෙළට අතර කඳ මැදි කොට ගෙන අඩි හයක් පමණ විෂ්කම්භය ඇති බෙර බුහුරක් වැනිව සාදාගත් කූඩුවෙකි. එය පිටතින් අවුරා ලන්නේය. බරින් ලොකු වෙනසක් නැති සොළොස් දෙනකු ඉදිරියට හැරී ඔංචිල්ලාවන්හි හිඳගත් පසු කූඩුව තුළට රිංගන දෙදෙනකු එහි ඇති හරස් පොලුවලට පිය තබමින් ඉහළට නැඟෙන්නට කරන උත්සාහයෙන් කූඩුවත් සමඟ ඔංචිල්ලාවන්හි හිඳ ගත්තෝ තම තමන්ගේ ඔංචිල්ලාව එල්ලුණු හරස්පොල්ල වටා යමින් ම කඳ වටා ද යන්නෝය. කූඩුව අවුරන්නේ ගොක්කොළ සහ පොල්කොළ රටාවෙනි.

ඔංචිලි වාරම්:

එක් පැත්තක පිරිමි ඇඳුමින් සැරසුණවුන් ද අනෙක් පැත්තේ ගෑනු ඇඳුමින් සැරසුණවුන් ද නැඟීමෙන් දෙගොල්ලක්ව පැදයන ගමන් උනුනට සරදම් ලෙසිනුත් පිළිතුරු ලෙසිනුත් මනහර කවි ඇස්වීම මේ ඔංචිල්ලා පදින්නන්ට විශේෂ වූ සිරිතකි. එය ක්‍රමයෙන් අභාවයට යන බව පෙනේ. මෙහි දී අස්වන කවි ඔංචිලි වාරම් නමින් දනිති. පැදීම පටන්ගන්නේ බෙරයක් වයමින් පදින්නන්ටත් බලා සිටින්නන්ටත් අවවාද ලෙසින් අස්වන

“අට දෙන අටකොන වාඩි වෙයල්ලා
සිට ගෙන දෙදෙනෙක් පොලු පාගල්ලා”

ඈ වාරම් කවිත් සමඟ මය.

ඔංචිලි වාරම් කවිවලින් ඔංචිල්ලාව ගැන අරුම පුදුම තොරතුරු කියැවෙයි. එම පද්‍යයන් ගොතා ඇත්තේ ඔංචිල්ලාවක් පදින විට එහි ගමනට අනුකූල වන තාලවලිනි. සාමාන්‍යයෙන් මේ රටේ පවත්නා පැරණි පොදු ජන ක්‍රීඩා සියල්ලක්ම පත්තිනි දෙවියන්ගේ ක්‍රීඩා හැටියට හැඳින්වීම සිරිති. ඔංචිල්ලා පැදීම ද පත්තිනි දෙවියන්ගේ ක්‍රීඩාවක් හැටියට පෙන්වා දෙති. ඒ බව ඔංචිලි වාරම් කවිවල නොයෙක් විට සඳහන් වේ.