http://encyclopedia.gov.lk/si_encyclopedia/index.php?action=history&feed=atom&title=%E0%B6%85%E0%B6%AD%E0%B7%8A%E2%80%8D%E0%B6%BB%E0%B7%92_-_1 2026-05-23T20:20:29Z විකියෙහි මෙම පිටුව සඳහා ඇති සංශෝධන ඉතිහාසය MediaWiki 1.27.1 http://encyclopedia.gov.lk/si_encyclopedia/index.php?title=%E0%B6%85%E0%B6%AD%E0%B7%8A%E2%80%8D%E0%B6%BB%E0%B7%92_-_1&diff=1510&oldid=prev 2023-06-05T07:20:05Z

<p>&#039;අත්‍රි වනාහි වේදකාලීන ඍෂිවරයෙකි. ඍග්වේදයෙහි...&#039; යොදමින් නව පිටුවක් තනන ලදි</p> <p><b>නව පිටුව</b></p><div>අත්‍රි වනාහි වේදකාලීන ඍෂිවරයෙකි. ඍග්වේදයෙහි සතලිස් වරක් පමණ මොහුගේ නම සඳහන් වෙයි. මනුෂ්‍ය වර්ගයාගේ ආදි කල්පික මුතුන්මිත්තන් අතර වූ මනු (බ.) ආදීන් සමඟ මොහු ගැන ද ඍග්වේදයෙහි කියැවේ. මොහු පඤ්චජනයන්හට (බ.) අයිති ඍෂිවරයෙකි.<br /> <br /> ඍග්වේදයෙහි අත්‍රි ගැන බොහෝ විට දැක්වෙන්නේ අශ්වින් දෙදෙනා විසින් ආරක්ෂා කරනු ලබන්නකු ‍වශයෙනි. ඔවුහු අත්‍රි අන්ධකාරයෙන් මිදූහ; අත්‍රිත් ඔහුගේ පිරිසත් අග්නිකූටයෙකින් මිදූහ; ජරාවට පැමිණි ඔහුට තරුණ බව ලබා දුන්හ. ඉන්ද්‍ර (බ.) තෙමේ ද වරෙක අසුරයන් විසින් සිය ගණන් මෝහන්ද්වාරයන් ඇති ගෘහයන්හි බහාලන ලද අත්‍රිහට ඉන් පලා යන මං සලසා දුන්නේය.<br /> <br /> අත්‍රි තෙමේ ස්වර්භානු අසුරයා විසින් සඟවා තබන ලද සූර්‍ය්‍යයා සොයා ගෙන නැවැත අහසෙහි තැබී යයි ඍග්වේදයෙහි දැක්වේ. සූර්‍ය්‍යයා සොයා ගන්නා ලද්දේත් අහසෙහි තබන ලද්දේත් අත්‍රි විසින් යයි අර්ථවවේදයෙහි ද සඳහන් වෙයි. අත්‍රි තෙමේ අන්ධකාරය පහ කළ හෝතෘ (යඥකර්ම කරන්නා) යයි ද, &quot;වාච්&quot; (වචනය) කෙරෙන් උපන්නේ යයි ද හුදෙක් &quot;වාච්&quot; (වචනය) ම යයි ද ශතපථ බ්‍රාහ්මණයෙහි කියැවේ. &quot;අත්‍රි&quot; යන්නෙන් &quot;භක්ෂක&quot; යන අර්ථය පැවසේ යයි ද, එය &quot;අද්-භක්ෂණේ&quot; (කෑමෙහි) ධාතුයෙන් සිදුවිණැ යි ද කියත්.<br /> <br /> මහාකාව්‍යයන් ගෙතුණු අවධියේ දී අත්‍රි ද ප්‍රජාපතීන් දස දෙනාගෙන් කෙනකු වශයෙන් දැක්වුණේය. පසු කාලයේ දී හේ බ්‍රහ්මයාගේ සිතින් උපන් (මනසිජ) පුත්‍රයෙකැයි ද සප්තර්ෂින්ගෙන් (බ.) කෙනෙකැ යි ද සලකන ලදි. මොහු දක්ෂ ප්‍රජාපතිහුගේ දුවක වූ අනසූයා (බ.) පාවා ගත්තේය. දුර්වාසස් මොවුන් දෙදෙනාගේ පුත්‍රයායි. සෝම (චන්ද්‍රයා) ද දත්තාත්‍රෙය ද මොහුගේ පුත්‍රයෝ යයි පුරාණ ග්‍රන්ථයන්හි සඳහන් වේ. රාම සීතා දෙදෙන අත්‍රිත් අනසූයාත් බැහැදැක ගැනීම සඳහා චිත්‍රකූට පර්වතයට දකුණු දෙසින් වූ ඔවුන්ගේ ආශ්‍රමයට ගිය බව රාමායණයෙහි සඳහන් වෙයි. <br /> <br /> (සංස්කරණය:1963)<br /> [[ප්‍රවර්ගය:අ]]</div>

පරිපාලක