http://encyclopedia.gov.lk/si_encyclopedia/index.php?action=history&feed=atom&title=%E0%B6%8B%E0%B6%9C%E0%B7%8A%E0%B6%9C%E0%B6%BD%E0%B7%8A_%E0%B6%85%E0%B6%BD%E0%B7%94%E0%B6%AD%E0%B7%8A%E0%B6%B1%E0%B7%94%E0%B7%80%E0%B6%BB 2026-05-16T01:51:03Z විකියෙහි මෙම පිටුව සඳහා ඇති සංශෝධන ඉතිහාසය MediaWiki 1.27.1 http://encyclopedia.gov.lk/si_encyclopedia/index.php?title=%E0%B6%8B%E0%B6%9C%E0%B7%8A%E0%B6%9C%E0%B6%BD%E0%B7%8A_%E0%B6%85%E0%B6%BD%E0%B7%94%E0%B6%AD%E0%B7%8A%E0%B6%B1%E0%B7%94%E0%B7%80%E0%B6%BB&diff=8290&oldid=prev 2025-07-02T06:54:40Z

<p>&#039;සපරගමු පළාතේ රත්නපුර දිස්ත්‍රික්කයෙහි කඩවත ම...&#039; යොදමින් නව පිටුවක් තනන ලදි</p> <p><b>නව පිටුව</b></p><div>සපරගමු පළාතේ රත්නපුර දිස්ත්‍රික්කයෙහි කඩවත මැද කෝරළයට අයත් අලුත්නුවර නම් ග්‍රාමයෙහි පිහිටි මේ ස්ථානය එහි වූ කතරගම දෙවියන් උදෙසා කරවන ලද දේවාලය නිසා ප්‍රසිද්ධියට පැමිණියේය. එම දේවාලය ශක වර්ෂ 1304 (ක්‍රි.ව. 1382) දී පමණ මේ ප්‍රදේශය ආණ්ඩු කළ ‘සූර්‍ය්‍ය මහරජ’ නම් වූ ප්‍රදේශාධිපතියකු විසින් කරවන ලදැයි උග්ගල් අලුත්නුවර දේවාලයේ ලේකම්මිටියේ සඳහන් වෙයි. කලකට පසු මේ ප්‍රදේශය පාලනය කළ ‘යාපා’ නම් අධිපතියකු විසින් දේවාලය දියුණු කොට විහාර චෛත්‍ය ආදිය ද කරවා එහි සංඝාරාමයකුදු ගොඩනඟන ලද්දේය. එසේ ම මෙහි පැරණි පත්තිනි දේවාලයක් ද වෙයි. දේවාලයට පුද කරන ලද බොහෝ නින්දගම් ද මේ ස්ථානයට ඇත. චාරිත්‍රානුකූලව වර්ෂයක් පාසා ඇසළ පෙරහැර මෙහි පවත්වනු ලැබේ. මේ ස්ථානය සංවර්ධනය කර වූ යාපා රජ සීතාවක රාජසිංහ සමඟ යුද වැදුණ අයෙකි. ඔහු ජය පතා මේ දේවාලයට රන්පණම් දහසකින් බැඳි පියල්ලක් භාර වූ බව ද සමීපයෙහි පිහිටි කොස්ගසක එය එල්ලූ බව ද ලේකම් මිටියෙහි සඳහන් වෙයි. ශතවර්ෂ තුනහතරක් පැරණි වූ එම ඓතිහාසික කොස්ගස ‘කොස්රුප්පේ’ නමින් හඳුන්වනු ලබනුයේ දැනුදු දක්නට ඇත. උග්ගල් අලුත්නුවර දේවාලය පිළිබඳ තවත් තොරතුරු ‘සපරගමුවේ පැරණි ලියවිලි’ නමැති ග්‍රන්ථයෙන් දත හැකිය. <br /> <br /> (සංස්කරණය: 1970)<br /> <br /> [[ප්‍රවර්ගය: භූගෝල විද්‍යාව - ලංකාව]] <br /> <br /> [[ප්‍රවර්ගය: උ]]</div>

Senasinghe