http://encyclopedia.gov.lk/si_encyclopedia/index.php?action=history&feed=atom&title=%E0%B6%8B%E0%B6%AD%E0%B7%94%E0%B6%BB%E0%B7%94%E0%B6%9A%E0%B7%94%E0%B6%BB%E0%B7%94_%E0%B6%AF%E0%B7%92%E0%B7%80%E0%B6%BA%E0%B7%92%E0%B6%B1 2026-05-15T08:30:49Z විකියෙහි මෙම පිටුව සඳහා ඇති සංශෝධන ඉතිහාසය MediaWiki 1.27.1 http://encyclopedia.gov.lk/si_encyclopedia/index.php?title=%E0%B6%8B%E0%B6%AD%E0%B7%94%E0%B6%BB%E0%B7%94%E0%B6%9A%E0%B7%94%E0%B6%BB%E0%B7%94_%E0%B6%AF%E0%B7%92%E0%B7%80%E0%B6%BA%E0%B7%92%E0%B6%B1&diff=9136&oldid=prev 2025-11-24T05:35:42Z

<p>&#039;බෞද්ධ සාහිත්‍යයෙහි දැක්වෙන පරිදි මේ සක්වල ඇත...&#039; යොදමින් නව පිටුවක් තනන ලදි</p> <p><b>නව පිටුව</b></p><div>බෞද්ධ සාහිත්‍යයෙහි දැක්වෙන පරිදි මේ සක්වල ඇතුළත මහාමේරු පර්වතය සිසාරා පිහිටි පුබ්බවිදේහ, ජම්බුදීප, අපරගෝයාන, උත්තරකුරු යන සතර මහාද්වීපයන් අතුරෙහි මහමෙරට උතුරු දිගින් පිහිටි දිවයින උත්තරකුරු (උතුරුකුරු) නම් වෙයි. මේ දිවයින අයම් විතරින් අටදහසක් යොදුන් පමණ වෙයි. අවටින් සූවිසි දහසක් යොදුන් පමණ වෙයි. එහි වැසියෝ අවුරුදු දහසක් ආයු වළඳති. ඔහු හැම කල්හි පඤ්චශීලයෙන් සිල්වත් වෙති. ඔවුනට &quot;මාගේ අඹු දරුවෝ යැ, දැසි දස්හු යැ, කෙත්වතු යැ, රන්-රිදී යැ&quot; යනාදීන් තම තමා අයත් කොටගත් දැයෙක් නැත (අමමා අපරිග්ගහා). ඔහු සී සෑම් ආදියෙන් කෘෂිකර්ම ද නොකෙරෙති (න තෙ බීජං වපපන්ති නපි නීයන්ති නඞ්ගලා). එහි කුඩු පොතු නැති වැ සහල් මැ පැසුණු ස්වයංජාත හැල් වෙයි. එයින් සහල් ගෙන රන් බඳුනෙහි ලා ජෝතිය නම් පාසාණයෙන් කළ උදුනෙහි තැබූ කල්හි ඒ ගලින් මැ ගිනි නැගී බත පැසී නිවී යෙයි. ඒ බත වැළඳීමට සූප ව්‍යඤ්ජන ද අවශ්‍ය නොවෙයි. තම තමා කැමති ව්‍යඤ්ජන රසය ද එහි මැ වෙයි.<br /> <br /> එහි සියක් යොදුනෙක පැතිරැ සිටි කල්පවෘක්ෂයෙක් ද වෙයි. එයිනුදු එහි වැසියනට ආහාරපාන උපදනේය. වස්ත්‍රාභරණාදිය ද ඒ කප්රුකින් ම උපදනේය.<br /> <br /> ආටානාටිය සූත්‍රයෙහි දැක්වෙන පරිදි වෛශ්‍රවණයාගේ විශාණ රාජධානිය පිහිටියේ ද උතුරුකුරු දිවයිනෙහිය. අඞ්ගුත්තරනිකායේ නවක නිපාතයෙහි උතුරුකුරු වැසි මනුෂ්‍යයෝ කරුණු තුනකින් තව්තිසා වැසි දෙවියන් හා දඹදිව් වැසි මිනිසුන් හා ඉක්මවා සිටිනාහයි වදාරන ලද්දේය. තෘෂ්ණා රහිත බව හෝ නිදුක් බව, “මේ මාගේ” යයි වෙන් කොට ගත් දැයක් නැති බව, නියතයෙන් ම අවුරුදු දහසක් ආයු ඇති බව (අමමා අපරිග්ගහා නියතායුකා) යන මෙයිනි.<br /> <br /> <br /> මන්ධාතු සක්විති රජු චක්‍රරත්නානුභාවයෙන් සිව්දිව්හි සැරිසරන කල්හි ඔහු සමග පැමිණි ඒ ඒ ද්වීපවාසීන් අතුරෙන් උතුරුකුරු වැසියන් නිවාස ග්‍රහණය කළ ජනපදය &quot;කුරු&quot; (කුරුක්ෂේත්‍ර) යයි ව්‍යවහාරයට පැමිණි බව ද සඳහන් වෙයි. ඒ කුරුජනපද වැසියෝ ඍතු සම්පත් ආදිය හේතු කොට ගෙන සෙසු ජනපද වැසියනට වඩා නුවණැත්තාහු වෙති. එහෙයින් බුදුරජාණන් වහන්සේ ඔවුනට මහා සතිපට්ඨාන සූත්‍රාන්තාදි ගැඹුරු දහම් වදාළ බව ද එරට දැසි දසුන් පවා සතිපට්ඨාන භාවනා පුහුණු කළ බව ද සතිපට්ඨාන අටුවායෙහි සඳහන් වෙයි.<br /> <br /> <br /> ජම්බුද්වීපයෙහි “වර්ෂ” නාමයෙන් බෙදන ලද නව ජනපදයන් අතුරෙහි එක් වර්ෂයෙක් &quot;උත්තරකුරු&quot; නම් වේ යයි ත්‍රිකාණ්ඩ ශේෂයෙහි දැක්වෙයි. එද යටකී කුරු ජනපදය මැයි. මහාභාරතයෙහි ද උතුරුකුරු දිවයින ගැන කරුණු සඳහන් වෙයි. එහි දැක්වෙන පරිදි උතුරුකුරු දිවයින පිහිටියේ නීල පර්වතයෙන් දකුණෙහි මේරු පර්වතයට උතුරු දිශායෙහිය. එහි භූමි විස්තරය පිළිබඳව දක්වන කරුණු පූජාවලී විස්තරය හා බොහෝ දුර සැසැඳෙන බව ද පෙනේ.<br /> <br /> උතුරුකුරු දිව පිළිබඳව බෞද්ධ සාහිත්‍යයෙහි දැක්වෙන කරුණු ජිනාලඞ්කාර වණ්ණනායෙන් හා පූජාවලියේ 28 වැනි පරිච්ඡේදයෙන් ද සවිස්තරව දත හැක්කේය.<br /> <br /> (සංස්කරණය: 1970)<br /> <br /> [[ප්‍රවර්ගය: බෞද්ධ සාහිත්‍යය]] <br /> <br /> [[ප්‍රවර්ගය: උ]]</div>

Senasinghe