http://encyclopedia.gov.lk/si_encyclopedia/index.php?action=history&feed=atom&title=%E0%B6%91%E0%B6%A9%E0%B7%8A%E0%B7%80%E0%B6%A9%E0%B7%8A_III 2026-05-25T12:45:05Z විකියෙහි මෙම පිටුව සඳහා ඇති සංශෝධන ඉතිහාසය MediaWiki 1.27.1 http://encyclopedia.gov.lk/si_encyclopedia/index.php?title=%E0%B6%91%E0%B6%A9%E0%B7%8A%E0%B7%80%E0%B6%A9%E0%B7%8A_III&diff=11005&oldid=prev 2026-05-25T08:34:02Z

<p>&#039;(1312-77). එඩ්වඩ් II රජුගේ පුත්‍ර මොහු එංගලන්තයේ රජු බ...&#039; යොදමින් නව පිටුවක් තනන ලදි</p> <p><b>නව පිටුව</b></p><div>(1312-77). එඩ්වඩ් II රජුගේ පුත්‍ර මොහු එංගලන්තයේ රජු බවට පත් වූයේ 1327 දීය. ඔහු බාල වියෙහි සිටි බැවින් මුල දී රාජ්‍යභාරය ඉසබෙලා මවු බිසව හා ඇගේ වල්ලභ කුමාරයා වූ මෝටිමර් විසින් දරන ලදි. ඔවුන්ගේ අධිපතිබව නොරිස්සූ එඩ්වඩ් රජ සතළොස් හැවිරිදි වයසේ දී මෝටිමර් මරවා මව දිවි තෙක් සිර කර තැබීය. <br /> <br /> 1328 දී චාල්ස් IV නම් ප්‍රංස රජුගේ ඇවෑමෙන් එඩ්වඩ් ප්‍රංස සිහසුනට මවු පසින් තමාට හිමිව තිබූ උරුමකම් කී නමුත් ප්‍රංසවරු පිලිප් රජ බවට තෝරා ගත්හ. 1333 දී සාර්ථක ලෙස ස්කොට්ලන්තය ආක්‍රමණය කිරීමෙන් පසු ප්‍රංසයේ පිලිප් VI රජුගේ සහාය ස්කොට්ලන්තයට ලැබෙන්නට වීම නිසා ස්කොට්ලන්තය අත්හැර ප්‍රංසය වෙත නෙත් යොමු කළ එඩ්වඩ් රජ ප්‍රංසය හා යුද වැදිණ. එඩ්වඩ් රජ නැවතත් ප්‍රංස කිරුළට තමාට තිබූ අයිතිය ස්ථීර කර ගැනීමේ අදහසින් 1340 දී තමා ප්‍රංස රජු හැටියට ප්‍රකාශ කොට ෆ්ලෙමිංවරුන්ගේ ආධාර ද ලබා ප්‍රංසය හා යුද්ධාරම්භ කෙළේය. ජෝජ් III රජු දක්වා එංගලන්තයේ රජවරුන් තමන් ප්‍රංසයේ රජුන් හැටියට ප්‍රකාශ කරමින් වරින් වර ප්‍රංසය හා යුද වැදීම නිසා දික් ගැසුණු මේ යුද්ධය [[සියක්හවුරුදු යුද්ධය]] (බ.) නමින් ප්‍රකට විය. එඩ්වඩ් හා ඔහුගේ දෙටු පුත් කුමරා ද විසින් අත් කරගන්නා ලද ජයග්‍රහණවලින් පසු ඇති වූ සාමගිවිසුම අනුව එංගලන්තයට ඇක්විටේන් නම් වූ විශාල ප්‍රංස ප්‍රදේශයක් අයත් විය. මේ ප්‍රදේශයේ ප්‍රතිරාජවරයා හැටියට බ්ලැක් ප්‍රින්ස් නමින් ප්‍රසිද්ධ වූ සිය දෙටු පුතා යවනු ලැබීය. එහෙත් 1369 දී චාල්ස් V නම් ප්‍රංස රජ නැවත යුද්ධය ආරම්භ කොට ප්‍රංසයේ බොහෝ බ්‍රිතාන්‍ය ප්‍රදේශ අල්ලා ගත්තේය. 1375 දී යුද්ධය නිමාවට පත් කරනු ලැබූ විට එඩ්වඩ්ට ප්‍රංසයේ ඉතිරි වූයේ කැලේ, බෝඩෝ හා බ්රෙස්ට් ඇතුළත් කුඩා ප්‍රදේශයකි. <br /> <br /> එඩ්වඩ් III රජුගේ දීර්ඝ රාජ්‍ය කාලය බොහෝ දුරට එංගලන්තයේ අභ්‍යන්තර සාමය පැවති කාලයක් විය. නාවික යුද්ධ කීපයකින් ම ජයගත් ඔහු බ්‍රිතාන්‍ය නාවික හමුදාවේ නියම ආරම්භකයා හැටියට ද සමහරු සලකති. පිටරට යුද්ධ, මහාමාරිය (බ්ලැක් ඩෙත්) ආදි වසංගත, ගොවිතැන් පාළුවීම් ආදිය නිසා ඔහුට විශාල ධනහානිවලට මුහුණ පෑමට සිදුවිය. රජුගේ බිසව මිය ගිය පසු අනියම් භාර්යාව වශයෙන් ඔහු තබා ගත් ඇලිස් පෙරස් රජු හා රටේ පාලනය කෙරෙහි මහත් බලයක් පාන්නට වීම නිසා අවසාන කාලයේ දී පාලනය දූෂිත විය. ඔහුට දරුවෝ 12 දෙනෙක් වූහ. ඔටුන්න හිමි බ්ලැක් ප්‍රින්ස් නම් විරුදයෙන් හැඳින්වූ පුත් කුමරු තමාට කලින් ම 1376 දී මිය ගියෙන් රජු ඇවෑමෙන් රාජ්‍යය හිමි වූයේ බ්ලැක් ප්‍රින්ස්ගේ පුත්‍ර රිචඩ් කුමාරයාටය.<br /> <br /> (සංස්කරණය: 1974)<br /> <br /> [[ප්‍රවර්ගය: පුද්ගල චරිත-රාජ්‍ය පාලකයෝ-එංගලන්තය]] <br /> <br /> [[ප්‍රවර්ගය: එ]]</div>

Senasinghe