http://encyclopedia.gov.lk/si_encyclopedia/index.php?action=history&feed=atom&title=%E0%B6%91%E0%B6%A9%E0%B7%8A%E0%B7%80%E0%B6%A9%E0%B7%8A_VIII 2026-05-25T12:47:55Z විකියෙහි මෙම පිටුව සඳහා ඇති සංශෝධන ඉතිහාසය MediaWiki 1.27.1 http://encyclopedia.gov.lk/si_encyclopedia/index.php?title=%E0%B6%91%E0%B6%A9%E0%B7%8A%E0%B7%80%E0%B6%A9%E0%B7%8A_VIII&diff=11008&oldid=prev 2026-05-25T09:59:26Z

<p>&#039;(1894-1972). අධිරාජයකු වශයෙන් අනුගමනය කළ යුතු සම්ප්‍...&#039; යොදමින් නව පිටුවක් තනන ලදි</p> <p><b>නව පිටුව</b></p><div>(1894-1972). අධිරාජයකු වශයෙන් අනුගමනය කළ යුතු සම්ප්‍රදාය බිඳ ඇති කර ගත් ප්‍රේම සම්බන්ධය කිරීටයට වැඩියෙන් අගය කරමින් සිහසුන හැර දැමූ බ්‍රිතාන්‍ය අධිරාජයාය. <br /> <br /> මහාබ්‍රිතාන්‍යය, අයර්ලන්තය හා මුහුදින් එතර බ්‍රිතාන්‍ය ඩොමීනියන් ප්‍රදේශ යන මේවායේ රජ පදවිය ද ඉන්දියාවේ අධිරාජ පදවිය ද දැරූ එඩ්වඩ් VIII ජෝජ් V රජුගේ ජ්‍යෙෂ්ඨ පුත්‍රයාය. මොහු උපදින විට පියා යෝක්හි ආදිපාද පදවිය දැරීය. 1910 දී වේල්ස්හි කුමාරයා බවට පත් කරනු ලැබූ එඩ්වඩ් 1936 දී සිංහාසනාරූඪ විය. ඔහු රජ පදවිය ඉසුලුයේ 11 මසකට ද අඩු කාලයකි. <br /> <br /> 1911 දී නාවික හමුදා නිලධාරි පදවියක් ලැබූ හෙතෙම 1914 දී ග්‍රෙනඩියර් ආරක්ෂක හමුදාවට බැඳුණේය. ඔහු I වන ලෝක සංග්‍රාමයේ දී බටහිර පෙරමුණෙහි ද මිසරයෙහි හා ඉතාලියෙහි ද යුද සේවය කෙළේය. පසු කල සමාජ කටයුතුවල යෙදී කළ සේවය නිසා ද එඩ්වඩ් කුමාරයා කාගේත් පාහේ සිත් දිනා ගත්තේය. <br /> <br /> 1918 දී සාමි මන්ත්‍රී මණ්ඩලයේ අසුන් ගත් හෙතෙම 1919 සිට විදේශ (නිල) චාරිකා රාශියක යෙදුණේය. මේ ගමන්වල දී අධිරාජ්‍යයේ සෑම රටකට ම වාගේ ගිය ඔහු යුරෝපීය රටවල ද එක්සත් ජනපදයෙහි හා දකුණු ඇමෙරිකාවෙහි ද සංචාරය කෙළේය. 1921 දී ඔහු ඉන්දියා චාරිකාවේ යෙදුණේ බ්‍රිතාන්‍ය පාලනයට විරුද්ධව ගාන්ධිතුමා ප්‍රමුඛ ඉන්දියානුන් බලවත් උද්ඝෝෂණ පැවැත්වූ කාලයකය. මේ ගමනේ දී බුරුමය, ලංකාව, සිංගප්පූරුව, හොංකොං හා ජපානය යන රටවල සැරිසැරූ මෙතෙම ඒ හැම තැනක දී ම ජනතාවගේ හිත් දිනාගත්තේය. ඉන්දියාවේ තන්හි තන්හි එඩ්වඩ් කුමරු නොපිළිගැනීමේ වර්ජනයන් පැවති නමුත් ඉන්දියා චාරිකාව බෙහෙවින් සාර්ථක විය. <br /> <br /> පිය රජුගේ මරණින් පසු 1936 ජනවාරි 20 දා VIII වන එඩ්වඩ් නමින් රජ වූ ඔහුගේ රාජ්‍ය කාලය කෙළවර වූයේ එම වර්ෂයේ ම දෙසැම්බර් 11 වැනි දාය. <br /> <br /> මුළු ලෝකය පුරා මහත් ආන්දෝලනයක් ඇති කළ ප්‍රේම සම්බන්ධයක බැඳුණු එඩ්වඩ් VIII රජ ‘ඉරු නොබසින මහා අධිරාජ්‍යයේ’ කිරුළ ස්වකීය ප්‍රේමය වෙනුවෙන් පරිත්‍යාග කරමින් 1936 දෙසැම්බර් 11 වැනි දින සිංහාසනය සිය මලණුවන්ට භාර කොට රජකමින් අස් වූයේය. ලංකා ඉතිහාසයේ සාලිය අශෝකමාලා කථාව සිහිගන්වන මේ ප්‍රේම සිද්ධිය ලෝක ඉතිහාසයේ අනුපම ප්‍රේම ජවනිකාවක් හැටියට සැලකේ. කලින් දෙවරක් විවාහව සිටි සාමාන්‍ය ඇමෙරිකානු කාන්තාවක වූ සිම්සන් (වොලිස් වෝෆීල්ඩ්) මැතිණිය හා එඩ්වඩ් රජු අතර ලියලමින් පැවති සම්බන්ධය ගැන රටේ බලසම්පන්න කොටසකගේ විරුද්ධත්වය පැනනැඟිණ. මේ කරුණ ගැන රජු හා අගමැති බෝල්ඩ්වින් මහතාත් අතර කීපවරක් ම සාකච්ඡා ඇති විය. දෙවරක් දික්කසාද වූ ස්ත්‍රියක තම රැජන හැටියට පිළිගනු තබා ඇයට රැජනගේ තත්වය නොපැවරෙන අන්දමේ අසම වර්ග විවාහයකටවත් (morganatic marriage) රජුට ඉඩදීමට ඩොමීනියන් රටවල ආණ්ඩු ද එංගලන්ත සභාව හා එරටවාසී බහුතර සංඛ්‍යාව ද බලවත් සේ විරුද්ධ බව බෝල්ඩ්වින් මහතා දැන්වීය. තමා ප්‍රේම කළ කාන්තාව හා විවාහ වීමට ස්ථිර ලෙස ම අධිෂ්ඨාන කර ගෙන සිටි එඩ්වඩ් VIII රජ ඉහත සඳහන් පරිදි ලෝකයා විස්මයට පත් කරමින් සිහසුන හැර දමා නිදහස් දිවියට පා තැබීය. ඊට පසුදින ම ජෝජ් VI රජු විසින් වින්සර් ආදිපාද පදවියෙන් පුදනු ලැබූ ඔහු 1937 ජූනි මාසයේ දී ප්‍රංසයේ දී සිම්සන් මැතිණිය හා විවාහ විය. <br /> <br /> 1940 සිට 1945 දක්වා වින්සර් ආදිපාදවරයා බහාමා දූපත්හි ආණ්ඩුකාර පදවිය ඉසුලුවේය. ඉන් පසු බොහෝ කොට ම ප්‍රංසයේ අප්‍රකට ජීවිතයක් ගත කරමින් සිටිය දී 1972 මැයි මස 28 වැනි දින පරලෝ සැපත් වූ මෙතෙම ජූනි මස 5 වැනි දින එංගලන්තයේ වින්සර්හි රාජකීය සුසාන භූමියේ භූමදාන කරනු ලැබීය.<br /> <br /> (සංස්කරණය: 1974)<br /> <br /> [[ප්‍රවර්ගය: පුද්ගල චරිත-රාජ්‍ය පාලකයෝ-එංගලන්තය]] <br /> <br /> [[ප්‍රවර්ගය: එ]]</div>

Senasinghe