http://encyclopedia.gov.lk/si_encyclopedia/index.php?action=history&feed=atom&title=%E0%B6%91%E0%B6%B8%E0%B7%8A%E0%B6%B4%E0%B6%BA%E0%B7%92%E0%B6%B8%E0%B7%8F%E0%B7%80 2026-06-17T11:38:11Z විකියෙහි මෙම පිටුව සඳහා ඇති සංශෝධන ඉතිහාසය MediaWiki 1.27.1 http://encyclopedia.gov.lk/si_encyclopedia/index.php?title=%E0%B6%91%E0%B6%B8%E0%B7%8A%E0%B6%B4%E0%B6%BA%E0%B7%92%E0%B6%B8%E0%B7%8F%E0%B7%80&diff=11199&oldid=prev 2026-06-16T09:55:29Z

<p>&#039;(Empyema). මේ වූකලි වංක්‍රීය කුහරයේ (pleural cavity) සැරව රැස්...&#039; යොදමින් නව පිටුවක් තනන ලදි</p> <p><b>නව පිටුව</b></p><div>(Empyema). මේ වූකලි වංක්‍රීය කුහරයේ (pleural cavity) සැරව රැස්වීමෙන් හට ගන්නා රෝගයකි. මේ සැරව රැස්වීම බොහෝවිට මස්තුමය අපලයනය (serous effusion) හේතුකොට ගෙන සිදු වේ. සමහරවිට ආරම්භයේ සිට ම සැරව ඇති වන්නට පුළුවන. සාමාන්‍යයෙන් මේ රෝගය සෑදෙන්නේ යාබද ඉන්ද්‍රියයන්ගෙන් (විශේෂයෙන් පෙණහලුවලින්) ඇති වන ආසාදනය වංක්‍රියගත වීමෙනි. මෙයට හේතු වන ප්‍රධාන කරුණු නම්: <br /> <br /> (1) පිණ්ඩක (lobar) නියුමෝනියාව, <br /> <br /> (2) පරිකන්තුවෙහි (pericardium), හෝ මධ්‍යවණ්ටනයෙහි (mediastinum) හෝ ශ්වසනකාර්ෂයෙහි පූතිතත්වය, <br /> <br /> (3) උරසෙහි කවර ඉන්ද්‍රියයක වුව ද ඇති වන ටියුබකුලෝසියාව, <br /> <br /> (4) විශිෂ්ට (specific) උණරෝග, <br /> <br /> (5) පුප්ඵුසයේ, අක්මාවේ, කණ්ඨයේ හෝ අධඃප්‍රාචීර (subphrenic) පටකවල විස්ඵෝටය, <br /> <br /> (6) පූතිරක්තතාව (septicaemia) <br /> <br /> (7) උරස් භිත්තිය තුවාළ වී බාහිර අණු ජීවීන් වංක්‍රියගතවීම හා (8) නොසැලකිලිමත් ලෙස කෙරෙන ශල්‍යකර්මත්ය. <br /> <br /> එම්පයිමා රෝගය උපදවන ජීවීන් අතුරෙන් නියුමොකොකසය, ස්ට්‍රෙප්ටොකොකසය, ස්ටැෆිලොකොකසය, ටියුබකල් බැසිලය හා කොලිෆෝම් බැසිලය යන මොව්හු ප්‍රධානය. මෙයින් බොහෝ විට ම රෝගයට හේතු වන්නේ නියුමොකොකසයයි. නවීනතම ප්‍රබල ඖෂධයන්ගේ පිහිටෙන් නියුමෝනියාව අනුව යන එම්පයිමා සංඛ්‍යාව බෙහෙවින් අඩු වුව ද මේ වන තුරු ම වැඩි වශයෙන් මේ රෝගය උපදින්නේ නියුමොකොකස මගිනි. විස්ඵෝටවලින් හටගැනෙන එම්පයිමාව අණු ජීවීන් කීප වර්ගයක් මිශ්‍ර වී ඇති වන්නට පුළුවන. <br /> <br /> == රෝග ලක්ෂණ ==<br /> එම්පයිමාව සාමාන්‍යයෙන් මූලික ලෙඩක් නොවන නිසා එහි ආරම්භක රෝග ලක්ෂණ මූලික රෝගයෙහි රෝග ලක්ෂණවලට මුවා වී තිබේ. එම්පයිමාවෙහි සාමාන්‍ය රෝග ලක්ෂණ නම් උණ, වෙවුලුම, ඩහදිය දැමීම, කැස්ස, පපුවේ ඉදිමුම, රිදුම සහ වේදනාව යන මේවාය. මේ ලකුණු සියල්ල ම සෑම රෝගියකුට ම නැත. සමහර ලෙඩුන්ට මේ ලකුණු එකක් වත් නැති වන්නට පුළුවන. මස්තුමය අපලයනයක තරලය ක්‍රමානුකූලව අඩු නුවූවොත් සැරව ඇති වන්නට පුළුවන් බව මෙහි ලා සැලකිය යුතු කරුණකි. නියුමෝනියාව නියම කාලයේ දී සුව නොවුවහොත් හෝ සුව අතට හැරීමෙන් පසු නැවත අලුත් වූවාක් මෙන් පෙනෙතොත් එම්පයිමාව ගැන සැක කළ යුතුය. <br /> <br /> එම්පයිමාවෙහි ලක්ෂණ වංක්‍රීය මස්තුමය අපලයනයෙහි ලක්ෂණවලට සමානය. අන්තර්පිණ්ඩක සුළු අපලයනයක් සාමාන්‍ය පරීක්ෂණයකින් දැනගන්නට නුපුළුවන. සුළු අපලයනයක් ඇති වූ විට පවා රෝගග්‍රස්ත පාර්ශ්වයෙහි ශ්වසන චලනය හීන කරයි. අපලයනය වැඩි වුවොත් අන්තර් පර්ශුක අන්තර නෙරා සිටී. ශ්වසන ශබ්ද අඩු වේ. සමහරවිට නැත්තට ම නැති වේ. තරලයෙහි ඉහළ මට්ටම කිට්ටුව ක්ලෝම ශ්වසනය කනට ඇසේ. කල්ගිය එම්පයිමාවක ලකුණු මීට වෙනස්ය. රෝගී පැත්තේ උරස ඇකිළී අන්තර් පර්ශුක අන්තර කුඩා වේ. ඉන්පසු පැති කුදය සෑදෙන්නට පුළුවන. ප්‍රාවීරය උස්ව රෝගී පැත්තට මධ්‍යවණ්ටනය සහ එහි අඩංගු ඉන්ද්‍රිය ඇදී යයි. ඇඟිලිවල අන්තිම පුරුක් මහත් වේ. මීට අමතරව තවත් අතුරු ආබාධ ඇතිවන්නට ද ඉඩ තිබේ. මේ ආබාධ අතුරින් සමහරක් නම්, පරිකන්තුදාහය (pericarditis), අන්තෝකන්තුදාහය (endocarditis), ආවෘතිදාහය (meningitis), පර්වදාහය (arthritis), මස්තිෂ්ක විස්ඵෝටය (cerebral abscess) යන මේවායි. කල් පැවති එම්පයිමාවක් නම් රෝගියාගේ අක්මාව සහ පිලාව මහත් වී පිෂ්ටාහ රෝගය (amyloid disease) සෑදෙන්නට පුළුවන. <br /> <br /> මූලික රෝගයක් සමඟ පවතින නිසාත් රෝග ලක්ෂණ ප්‍රකටව නැති නිසාත් එම්පයිමාව අඳුනා ගැනීම දුෂ්කර කාර්යයකි. එම නිසා වංක්‍රීය කුහරය අසල ඉන්ද්‍රියයන්හි ආබාධ ඇති කල එම්පයිමාව ඇත් දැයි පරීක්ෂ්‍යකාරී විය යුතුයි. රෝග ලක්ෂණ අවිනිශ්චිත සෑම අවස්ථාවක දී ම පපුව X-කිරණ මාර්ගයෙන් පරීක්ෂා කළ යුතුය. තවත් ප්‍රයෝජනවත් පරීක්ෂණයක් නම් රුධිරයෙහි ශ්වේතාණු සංඛ්‍යාව බලා ගැනීමයි. නිරෝගී කෙනකුන්ගේ සාමාන්‍ය ශ්වේතාණු සංඛ්‍යාව රුධිර ඝන මිලි මීටරයක 7,000-10,000 අතර වේ. එම්පයිමා රෝගියකුගේ ශ්වේතාණු සංඛ්‍යාව 50,000ක් පමණ වන තුරු වැඩි වන්නට පුළුවන. හැරත් නිරෝගී කෙනකුන්ගේ ශ්වේතාණු සංඛ්‍යාවෙහි බහුරූප න්‍යෂ්ටික සෛල ඇත්තේ 60%ක් පමණය. එහෙත් එම්පයිමා රෝගියා තුළ මේ සෛල 90%ක් පමණ ඇති විය හැක. රෝගය නිශ්චය වශයෙන් දැනගත හැක්කේ වංක්‍රීය කුහරය සිදුරු කර සැරව ටිකක් ගෙන පරීක්ෂා කිරීමෙනි.<br /> <br /> එම්පයිමාව තදබල අසනීපයකි. නිසියාකාර පිළියම් නොකොට මාස ගණන් රෝගය පැවතුණොත් රෝගී පැත්තේ පෙනහැල්ල තෙරපී විනාශ වේ. නියුමොකොකස හේතුවෙන් ඇති වන එම්පයිමාව අන් ජීවීන් හේතුවෙන් ඇති වන එම්පයිමාවට වඩා පහසුවෙන් සුව කර ගත හැක. ඖෂධ මාර්ගයෙන් ඉක්මනට ලෙඩය සුව නුවුවොත් ශල්‍ය කර්මයෙන් සැරව අස් කරන්නට සිදු වේ. එසේ නොකොළොත් පෙනහැල්ල හෝ පිටේ සම සිදුරු කරගෙන සැරව එළියට එයි. ප්‍රාචීරය සිදුරු කරගෙන එන සැරව උදර කුහරගත වීමෙන් පරිතානදාහය (peritonitis) ද ඇති විය හැකිය. <br /> <br /> (කර්තෘ: [[ඊ.ඇම්. විජේරාම]]) <br /> <br /> (සංස්කරණය: 1974)<br /> <br /> [[ප්‍රවර්ගය: වෛද්‍ය විද්‍යාව]] <br /> <br /> [[ප්‍රවර්ගය: එ]]</div>

Senasinghe