http://encyclopedia.gov.lk/si_encyclopedia/index.php?action=history&feed=atom&title=%E0%B6%91%E0%B6%BD%E0%B7%92%E0%B7%83%E0%B6%B6%E0%B6%AD%E0%B7%8A_I 2026-06-13T05:58:16Z විකියෙහි මෙම පිටුව සඳහා ඇති සංශෝධන ඉතිහාසය MediaWiki 1.27.1 http://encyclopedia.gov.lk/si_encyclopedia/index.php?title=%E0%B6%91%E0%B6%BD%E0%B7%92%E0%B7%83%E0%B6%B6%E0%B6%AD%E0%B7%8A_I&diff=11077&oldid=prev 2026-06-12T10:00:54Z

<p>&#039;(1533-1603). 1588 සිට 1603 දක්වා එංගලන්තයේ හා අයර්ලන්තයේ රැ...&#039; යොදමින් නව පිටුවක් තනන ලදි</p> <p><b>නව පිටුව</b></p><div>(1533-1603). 1588 සිට 1603 දක්වා එංගලන්තයේ හා අයර්ලන්තයේ රැජිනව සිටි මෝ තොමෝ අටවැනි හෙන්රි නම් ඉංග්‍රීසි රජතුමාගේ සහ ඔහුගේ දෙවැනි බිරිය වූ ඈන් බොලීන්ගේ දුවයි. 1533 සැප්තැම්බර් මස 7 වැනි දා ග්‍රිනිච් මාළිගයේ දී මෙලොව එළිය දුටු එලිසබත් කුමරිය නොබෝ කලකින් ම සිය මවගෙන් වෙන් කරනු ලැබුව ද පසු කලෙක හෙන්රිගේ අවසාන බිරිය වූ කැතරින් පාර් දේවිය විසින් ආදරයෙන් හදාවඩාගනු ලැබුවාය. ඇයට මේරි නම් වූ වැඩිමහල් අර්ධ සහෝදරියකුත් එඩ්වඩ් නම් වූ බාල අර්ධ සහෝදරයෙකුත් සිටියහ. මේ දෙදෙන ම ඇයට පෙරාතුව එංගලන්ත කිරුළ දැරූහ. <br /> <br /> එලිසබත් කුමරියට තෙවස් පිරෙන්නටත් පළමු හෙන්රි VIII විසින් ඇයගේ මව මරවන ලද්දීය. එලිසබත් කුමරියට ඉංග්‍රීසි සිහසුනට කිසිදු අයිතියක් නැතැයි ද පාර්ලිමේන්තුව මඟින් ප්‍රකාශයට පමුණුවනු ලැබීය. එහෙත් පිය රජුගේ අන්තිම කැමති පත්‍රයෙහි සිංහාසන අනුප්‍රාප්තිකයන්ගේ නාමලේඛනයට ඇයගේ නම ඇතුළු කැරිණි. එවකට එංගලන්තයේ සිටි සුප්‍රකට ආචාර්යවරයන් යටතේ අධ්‍යාපනය ලැබූ ඕතොමෝ ග්‍රීක් හා ලතින් ආදි සම්භාව්‍ය භාෂා ශාස්ත්‍රයන් පමණක් නොව ප්‍රංස, ස්පාඤ්ඤ හා ඉතාලි වැනි නූතන භාෂාවන් ද ප්‍රගුණ කළාය. පසු කාලයෙහි ඇයගේ කීර්තිමත් රාජ්‍ය පාලන සමයේ දී මේ අධ්‍යාපනය ඇයට බෙහෙවින් ආධාර වූ බව පෙනේ.<br /> <br /> ක්‍රි.ව. 1547 සිට 1554 දක්වා කාලය එලිසබත් කුමරියට බෙහෙවින් හිරිහැරදායක එකක් විය. රාජ්‍ය විරෝධී කුමන්ත්‍රණවලට සහභාගී වූ තැනැත්තියක ලෙස ඇය සැකයට භාජන කරනු ලැබුවාය. රෙපරමාදුකාරියක වශයෙන් සලකා ඇය මරුමුවට පත් කරන්නට ද උත්සාහ දරනු ලැබීය. 1554 දී ඇයට විරුද්ධව කුමන්ත්‍රණ චෝදනාවක් ඉදිරිපත් කොට සිරහාරයේ තබන ලද නමුදු මාස හතකින් පසු ඇයට නිදහස ලැබුණේය.<br /> <br /> 1554 වර්ෂාවසානයේ දී පෙරළා රජගෙට පැමිණි ඕතොමෝ නිදහසේ ජීවත් වන්නට වූවාය. එවකට රජ කළ මේරි රැජිනගේ රෙපරමාදු විරෝධී දරුණු ක්‍රියා කලාපය නිසා ඉංග්‍රීසි ජාතික රටවැස්සෝ කළකිරුණු සිතින් පසුවූහ. එබැවින්, 1558 දී මේරි රැජින මිය ගිය පසු, එලිසබත් අභිෂේකය ලදුයේ ඉංග්‍රීසි ජනතාවගේ ඉමහත් ප්‍රීතිඝෝෂා මධ්‍යයෙහිය.<br /> <br /> කෙසේ වුව ද ස්වකීය රාජ්‍ය සමය ආරම්භයේ පටන් ම බරපතළ ප්‍රශ්න රාශියකට මුහුණ පාන්නට එලිසබත්ට සිදු විය. ආගමික අර්බුද නිසා ආභ්‍යන්තරික වශයෙන් රට අවුල් වී තිබිණ. ස්පාඤ්ඤ, ප්‍රංස ආදී බලවත් යුරෝපීය රාජ්‍යයෝ ද එංගලන්තය ගිලගැනීමේ ආශාවෙන් මඬනා ලද්දෝ වූහ. රෝමානු කතෝලික සංවිධානයට පමණක් නොව කැල්වින්වාදී රෙපරමාදු ආගමට ද එලිසබත් කුමරිය අප්‍රසන්න වූයේ ඒ දෙක ම සිය ආධිපත්‍යයට තර්ජනයක් වන බව ඇය වටහාගෙන තුබුණු හෙයිනි. එහෙයින්, සෑම ප්‍රශ්නයක දී ම ඇයගේ ප්‍රතිපත්තිය වූයේ කිසියම් නිශ්චිත න්‍යායයක් අනුව ක්‍රියා කිරීම නොව සිය ආධිපත්‍යයට පහර නොවැදෙන සේ කටයුතු කිරීමයි. මේ සම්බන්ධයෙන් ඇයගේ අධ්‍යාපනය ද තියුණු බුද්ධිය ද සුදුසු සේවකයන් තෝරාගැනීමේ සමර්ථබව ද ඈට මහෝපකාරී වූ බව පෙනේ.<br /> <br /> එලිසබත්ගේ අභිෂේකයේ දී ඇය එංගලන්ත සභාවේ නායිකාව වශයෙන් පිළිගන්නා ලද නමුත් රෝමානු කතෝලිකයන් හෝ උග්‍ර රෙපරමාදුවාදීන් පිරිසක් වූ පියුරිටන්වරුන් හෝ බලයෙන් එංගලන්ත සභාවේ ආගමට හැරවීමට ඕ උත්සාහ නොගත්තාය. එහෙත් 1570 පමණ වන විට, රෝමය සමඟ පැවති සියලු සබඳතා සිඳබිඳ දමා තිබිණ. ඇය රෝමානු කතෝලික සභාවෙන් නෙරැපූ පාප්වහන්සේ ඇයගේ යටත් වැසියන් ඈට පක්ෂපාතී විය යුතු නැතැයි ප්‍රකාශයට පැමිණවූහ. මෙහි ප්‍රතිඵලයක් වශයෙන් 1581-87 අතර කාලයේ දී එලිසබත්ට විරුද්ධව කුමන්ත්‍රණ ගණනාවක් ම පැනනැඟුණු බව පෙනේ. මේ කුමන්ත්‍රණ මාලාව වූකලි හුදු ආගමික චේතනාවන්ගෙන් පමණක් නොව දේශපාලන පරමාර්ථයන්ගෙන් ද පොලඹවන ලද්දක් බව පැහැදිලිය. එහෙයින් උග්‍ර ක්‍රියාමාර්ගයක් අනුගමනය කිරීමට රජයට සිදු විය. කෙසේ වුව ද එංගලන්තයට සතුරු වූ ස්පාඤ්ඤය කතෝලික පිලේ ප්‍රමුඛත්වය ගෙන සිටි බැවින් ද පැරණි රෝමානු කතෝලික නායකයන් බොහෝ ගණනක් ම මිය ගොස් සිටි බැවින් ද මේ කතෝලික ව්‍යාපාරය එතරම් ජනප්‍රිය නොවීය. කතෝලික පෙරමුණ විසින් රජකම බාර දෙන්නට ඉටා සිටි මේරි ස්ටුවට් කුමරිය එලිසබත් රැජින විසින් මරා දමනු ලැබීමෙන් ඇගේ පාලනයට එරෙහිව නැඟී සිටි එක් ප්‍රබල බලවේගයක් අතුරුදන් විය. මේ අතර එලිසබත්ගේ විරුද්ධත්වය තුබුණේ රෝමානු කතෝලිකයන් කෙරෙහි නොව රාජ ද්‍රෝහීන් කෙරෙහිය යන්න රටවැසියන්ට අවබෝධ වූ බව ද පෙනේ. එබැවින් ඇගේ රාජ්‍යසමයේ අපරභාගය වන විට රෝමානු කතෝලික තර්ජනය මුලිනුපුටා විවිධ ආගමික අදහස් දරන්නවුනට රිසි සේ සිය ආගම් අදහන්නට ඉඩ ප්‍රස්තාව සැලසීමට එලිසබත් රැජින සමත් වූවාය. සිය බලපරාක්‍රමයට තර්ජනයක් වූ පියුරිටන්වරුන් සම්බන්ධයෙන් ද ඥානාන්විත ප්‍රතිපත්තියක් අනුගමනය කිරීම නිසා ඉතා සුළු කලෙක දී පියුරිටන්වරුන්ගේ දේශපාලන බලපරාක්‍රමය සිඳ දමා සිය නායකත්වය තහවුරු කිරීමට ද ඇයට පිළිවන් විය.<br /> <br /> == විදේශ ප්‍රතිපත්තිය ==<br /> එලිසබත්ගේ රාජ්‍ය සමය විදේශීය අර්බුදවලින් ගහනව පැවති කාලයක් විය. එකල යුරෝපය පුරා රෙපරමාදු-රෝමානු කතෝලික ගැටුම් පැවතිණ. එපමණක් නොව ප්‍රංස, ස්පාඤ්ඤ යන දෙරාජ්‍යයෝ ද යුරෝපීය ආධිපත්‍යය අරභයා ඔවුනොවුන් සමඟ සටනට අර අඳිමින් සිටියෝය. <br /> <br /> මේ වන විට ඉංග්‍රීසි නාවික බලය තරමක් දුරට වැඩී තිබිණ. ඉංග්‍රීසි යාත්‍රිකයෝ විදේශයන්හි වෙළඳාම් කරමින් ද අන්‍ය ජාතිකයන්ගේ නැව් කොල්ලකමින් ද ලෝකයේ විවිධ ප්‍රදේශවල සැරිසැරූහ. බොහෝ විට ඉංග්‍රීසි ජාතිකයන්ගේ පහරට ගොදුරු වූවෝ එවක ප්‍රබල විදේශීය ව්‍යාපාරයන්හි නියුක්තව සිටි ස්පාඤ්ඤ ජාතික නාවිකයෝය. එබැවිනි ස්පාඤ්ඤය එංගලන්තයේ ප්‍රබලතම සතුරා වූයේ. රෝමානු කතෝලික ආගම දඩමීමා කරගෙන එංගලන්තය සිය ග්‍රහණයට ගැනීම සඳහා ස්පාඤ්ඤයේ රජු කටයුතු කරන බව ද ඉංග්‍රීසි ජාතිකයෝ දැන සිටියහ. එමෙන් ම ප්‍රබල යුරෝපීය රාජ්‍යයන් සමග සටන් කිරීමට තරම් ශක්තියක් එංගලන්තයට නොවූ බව ද එතරම් රහසක් නොවීය.<br /> <br /> එබැවින් එලිසබත්ගේ විදේශ ප්‍රතිපත්තියෙහි මූලික පරමාර්ථය වූයේ අනවශ්‍ය යුද්ධවලට සහභාගී නොවී යුරෝපීය රාජ්‍යයන් අතර එංගලන්තයේ කීර්තිය පතුරුවා හැරීමත් සිය බලය එංගලන්තය තුළ තහවුරු කර තබාගැනීමත් යයි සිතන්නට පුළුවන. මේ අනුව, මුල් අවධියේ දී ප්‍රංසය හා ස්පාඤ්ඤය අතර පැවැති අන්‍යෝන්‍ය ඊර්ෂ්‍යාව සිය වාසියට ම හරවාගත් එලිසබත් රැජින ඉංග්‍රීසි නාවික බලය තර කර ගැනීම සඳහා සුදුසු ඉඩකඩ සැලසුවාය. ඇගේ දූරදර්ශී ප්‍රතිපත්තියෙහි සැබෑ වැදගත්කම අවබෝධ වූයේ 1588 දී ස්පාඤ්ඤ නාවික හමුදාව විසින් එංගලන්තය ආක්‍රමණය කරන ලද අවස්ථාවේ දීය. එහි දී ස්පාඤ්ඤ නාවික බලඇණිය සහමුලින් ම විනාශ කර දමන්නට එංගලන්තය සමත් වූයෙන් ඇගේ විදේශීය කීර්තියට ද මුල්ගල තැබිණි. එලිසබත්ගේ අවසාන කාලයේ දී ඇගේ පාලනයට විරුද්ධව මහජන මතයක් පැනනැඟී එන්නට වුව ද අතිශයින් කම්කටොලු සහිත කාල පරිච්ඡේදයක දී ඉංග්‍රීසි ජාතිය දුර්භාග්‍යයෙන් ගලවාගෙන ඉංග්‍රීසි ජාතියේ කීර්තියට මුල්ගල් තැබූ තැනැත්තිය වශයෙන් ඇගේ නාමය ඉංග්‍රීසි ඉතිහාසයෙහි අමරණීය වෙයි.<br /> <br /> ස්පාඤ්ඤ ජාතිකයන්ගේ එඩි මැඩ, අයිරිෂ් ජාතික කැරලිකරුවන් මර්දනය කොට, එංගලන්තයේ එක්සත් බව තහවුරු කළ එලිසබත් තොමෝ ස්කොට්ලන්තයේ ජේම්ස් කුමරුවන්ට රජ බවට පැමිණීමට ඉඩකඩ සැලසීමෙන් ඉංග්‍රීසි රජපෙළපතෙහි අවිච්ඡින්නභාවය ද සුරක්ෂිත කළාය.<br /> <br /> 1603 මාර්තු මස 24 වැනි දින සිදු වූ ඇයගේ මරණයෙන් ටියුඩර් වංශික පාලනය අවසාන විය. සර් ප්‍රන්සිස් ඩ්රේක්, සර් ජෝන් හෝකින්ස් හා වෝල්ටර් රැලේ ආදීන් එංගලන්තය සමුද්‍ර බලය අතින් ප්‍රමුඛස්ථානයට ගෙන ඒම නිසාත්, බ්‍රිතාන්‍ය විජිත පිහිටුවීමේ අත්තිවාරම දැමීම නිසාත්, අතිශයින් වැදගත් වන එලිසබත් රැජිනගේ සමය විදේශ වෙළඳාම අතින් ද පූර්ව යුගයන් පසුබවා සිටි අතර ෂේක්ස්පියර්, ෆ්‍රැන්සිස් බේකන්, එඩ්මන්ඩ් ස්පෙන්සර් යනාදීන් විසින් හොබවන ලද එය ඉංග්‍රීසි සාහිත්‍යය පිළිබඳ ස්වර්ණ යුගය වශයෙන් ද සැලකේ. <br /> <br /> (සංස්කරණය: 1974)<br /> <br /> [[ප්‍රවර්ගය: රාජ්‍ය පාලකයෝ-එංගලන්තය]] <br /> <br /> [[ප්‍රවර්ගය: එ]]</div>

Senasinghe