http://encyclopedia.gov.lk/si_encyclopedia/index.php?action=history&feed=atom&title=%E0%B6%AD%E0%B7%9D%E0%B6%B8%E0%B7%83%E0%B7%8A_%E0%B6%85%E0%B6%BD%E0%B7%8A%E0%B7%80%E0%B7%8F_%E0%B6%91%E0%B6%A9%E0%B7%92%E0%B7%83%E0%B6%B1%E0%B7%8A 2026-05-25T17:15:12Z විකියෙහි මෙම පිටුව සඳහා ඇති සංශෝධන ඉතිහාසය MediaWiki 1.27.1 http://encyclopedia.gov.lk/si_encyclopedia/index.php?title=%E0%B6%AD%E0%B7%9D%E0%B6%B8%E0%B7%83%E0%B7%8A_%E0%B6%85%E0%B6%BD%E0%B7%8A%E0%B7%80%E0%B7%8F_%E0%B6%91%E0%B6%A9%E0%B7%92%E0%B7%83%E0%B6%B1%E0%B7%8A&diff=10993&oldid=prev 2026-05-25T03:24:37Z

<p>&#039;(1847-1931). ඇමෙරිකානු ජාතික නිමැවුම්කරුවෙකි. මොහු ව...&#039; යොදමින් නව පිටුවක් තනන ලදි</p> <p><b>නව පිටුව</b></p><div>(1847-1931). ඇමෙරිකානු ජාතික නිමැවුම්කරුවෙකි. මොහු වෙනුවෙන් අධිකාරපත්‍ර මගින් ආරක්ෂා කොට ඇති නිමැවුම් දෙදහසක් පමණ වේ. පොදු ජනයා අතර අද බහුලව භාවිත වන විදුලි පහන, ශබ්දවාහිනිය හා චිත්‍රපට වැනි නිමැවුම් ලොවට හඳුන්වා දෙන ලද්දේ මොහු විසිනි. 1847 පෙබරවාරි මස 11 වැනිදා ඇමෙරිකාවේ ඔහයෝ ජනපදයේ මිලාන් නගරයේ දී එඩිසන් උපන්නේය. මොහුගේ පාසැල් සමය මාස තුනක පමණ කෙටි කාලයකට පමණක් සීමා විය. එහෙත් ගෙදර දී පොතපත කියවීමෙන් හෙතෙම තම විද්‍යාත්මක දැනුම දියුණු කරගත්තේය. රසායන විද්‍යාව කෙරෙහි මහත් ඇල්මක් දැක්වූ මොහු කුඩා කාලයේ දී ම ගෙදර රසායනාගාරයක් පිහිටුවා ගෙන පරීක්ෂණ පැවැත්විය. ගුරුවරියක වූ මවගෙන් මේ සඳහා ඔහුට විශේෂ ආධාර ලැබිණි. <br /> <br /> 12 වැනි වියෙහි දී දුම්රියක රසකැවිලි හා පුවත්පත් වෙළෙන්දකු වශයෙන් රැකියාව ඇරඹූ හේ ටික කලක දී ම දුම්රිය පෙට්ටියක සවි කරගත් කුඩා මුද්‍රණාලයක් මගින් ‘Weekly Herald’ නම් සතිපතා පුවත්පතක් මුද්‍රණය කර බෙදා හැරියේය. මේ අතර තුර දී ම දුම්රියේ බඩු මැදිරියක කුඩා රසායනාගාරයක් ද තනාගෙන පරීක්ෂණ කටයුතු සඳහා තම විවේක කාලය යෙදවීය. එහෙත් දිනක් එම රසායනාගාරයේ වූ පොස්පරස් බෝතලයක් පෙරළීමෙන් රිය පෙට්ටිය ගිනිගැනීම නිසා මොහුට රැකියාව අහිමි විය. පසුව දුරලේඛක ක්‍රියාකරවන්නකු වශයෙන් මොහුට රැකියාවක් ලැබිණි. දුම්රියට අසුවීමට ගිය ළමයකු බේරාගත් මොහුට කෘතගුණ සැලකීමක් වශයෙන් ළමයාගේ පියා එම රැකියාව ලබා දුන් බව සඳහන් වේ. <br /> <br /> 1868 දී මොහු ඡන්දය ගණන් කිරීම සඳහා උපයෝගී කරගත හැකි යන්ත්‍රයක් නිපැදවීය. ඔහු අධිකාර පත්‍රයක් ලබාගත් පළමු යන්ත්‍රය ද මෙය විය. 1869 දී පෝප්-එඩිසන් සමාගම නම් වූ විදුලි ඉංජිනේරු සමාගමක කොටස්කරුවකු වශයෙන් කටයුතු කළ මොහු දූරලේඛක මගින් දෙනු ලබන වෙළඳ ඇණවුම් ස්වයං ක්‍රියව සටහන් කරගත හැකි උපකරණයක් නිපැදවීය. මෙම උපකරණයේ අයිතිය ඩොලර් 40,000කට විකුණූ එඩිසන් න්‍යුඅ’ක් (Newark) නගරයෙහි තමාගේ ම කර්මාන්ත ශාලාවක් ආරම්භ කෙළේය. එවිට මොහුගේ වයස අවුරුදු 22කි. එකල විද්‍යා ක්ෂේත්‍රයේ සොයා ගෙන තිබූ විවිධ විද්‍යාත්මක කරුණු උපයෝගී කොට ප්‍රායෝගික වශයෙන් භාවිතයට ගත හැකි අයුරු යන්ත්‍රසූත්‍ර නිපැදවීම සඳහා එඩිසන් තම කාර්ය මණ්ඩලය යෙදවීය. අධිකාර පත්‍ර මගින් විශාල නිමැවුම් සංඛ්‍යාවක් ආරක්ෂා කර ගැනීමට ඔහුට පුළුවන් වූයේ මේ නිසාය. <br /> <br /> 1875 දී තනන ලද කාබන් ට්‍රාන්ස්මීටරය, 1877 දී නිපදවන ලද ශබ්දවාහිනිය, 1879 දී නිපදවන ලද තාපදීප්ත විදුලි පහන හා 1896 දී වෙළඳපොළට ඉදිරිපත් කරන ලද සිනමා යන්ත්‍ර යනාදිය එඩිසන්ගේ නිමැවුම් අතර ප්‍රධාන තැන් ගනී.<br /> <br /> 1876 දී එඩිසන් මෙන්ලෝ පාක් නගරයෙහි විශාල පර්යේෂණාගාරයක් තැනවීය. 1887න් පසු ඔහු තම කාලයෙන් වැඩි කොටසක් තම පර්යේෂණාගාරයේ පරිපාලන කටයුතු වෙනුවෙන් වෙන් කෙළේය. <br /> <br /> එඩිසන් ආචරණය (Edison effect) යනුවෙන් හඳුන්වනු ලබන සංසිද්ධිය සොයා ගැනීමෙන් ශුද්ධ විද්‍යාවේ උන්නතිය සඳහා ද දායක වීමට එඩිසන්ට හැකි විය. තම විදුලි පහන පිළිබඳව පරීක්ෂණ පවත්වමින් සිටින විට, විදුලි පහන තුළට තවත් ලෝහ තහඩුවක් යොදා එය ධන විද්‍යුතයකට සම්බන්ධ කළ විට බල්බයේ සූත්‍රිකාව හා යොදන ලද තහඩුව අතර කෙළින් ම සම්බන්ධයක් නොමැති වුවත් සූත්‍රිකාව හා තහඩුව අතර විද්‍යුත් ධාරාවක් ගලා යන බව එඩිසන් පෙන්වා දුන්නේය. මෙම සංසිද්ධිය එඩිසන් ආචරණයයි. එකල මෙම සංසිද්ධිය ප්‍රයෝජනයට ගැනීමට ක්‍රමයක් ඔහුට නොපෙනුණ හෙයින් එය කෙරෙහි එතරම් සැලකිල්ලක් නොදක්වන ලදි. එහෙත් පසු කලෙක 1904 දී ජේ.ඒ. ප්ලෙමිං විසින් [[ඉලෙක්ට්‍රොනික නළ]] (බ.) නිපැදවීම සඳහා එඩිසන් ආවරණය යොදාගන්නා ලදී. <br /> <br /> (සංස්කරණය: 1974)<br /> <br /> [[ප්‍රවර්ගය: පුද්ගල චරිත - නවනිපැයුම්කරුවෝ]] <br /> <br /> [[ප්‍රවර්ගය: එ]]</div>

Senasinghe