http://encyclopedia.gov.lk/si_encyclopedia/index.php?action=history&feed=atom&title=%E0%B6%AF%E0%B7%8F%E0%B7%80%E0%B7%92%E0%B6%AD%E0%B7%8A 2026-05-18T10:19:41Z විකියෙහි මෙම පිටුව සඳහා ඇති සංශෝධන ඉතිහාසය MediaWiki 1.27.1 http://encyclopedia.gov.lk/si_encyclopedia/index.php?title=%E0%B6%AF%E0%B7%8F%E0%B7%80%E0%B7%92%E0%B6%AD%E0%B7%8A&diff=5404&oldid=prev 2024-04-16T07:40:46Z

<p>&#039;(David). (ක්‍රි.පූ. 1055-1015). බයිබලයේ පරණ තෙස්තමේන්තුවේ එ...&#039; යොදමින් නව පිටුවක් තනන ලදි</p> <p><b>නව පිටුව</b></p><div>(David). (ක්‍රි.පූ. 1055-1015). බයිබලයේ පරණ තෙස්තමේන්තුවේ එන ප්‍රකට චරිතයකි. (Judean) ජූදියන් රාජ පරම්පරාවෙහි ආරම්භක පාලකයා වන දාවිත්, (Israel) ඊශ්‍රාලයෙහි සහ ජුදාවෙහි (Judean) රජු ද වෙයි. විවිධාකාර ගෝත්‍රික ජන කොටස්වලින් සහ ප්‍රදේශීය පාලන ඒකකවලින් නිර්මිත වී තත්කාලීන ඊශ්‍රායෙල් ප්‍රදේශය සමස්තයක් ලෙස එක්සත් කරනු ලැබුයේ දාවිත් විසිනි. හෙතෙම යුදෙව් ජනයා අතර මෙසායා (Messiah) හෙවත් ගැලවුම්කාරයා ලෙස ද පිදුම් ලබයි. බයිබලයේ පරණ තෙස්තමේන්තුවේ මෙන් ම නව තෙස්තමේන්තුවේ ද මෙසායා ලෙස හඳුන්වන්නේ දාවිත්ගේ පුත්‍රයා ය. ජේසුස් වහන්සේ දාවිත්ගේ පරම්පරාවෙන් පැවත එන බව බයිබලයේ නව තෙස්තමේන්තුවෙහි සඳහන් වේ. එසේ ම ඉස්ලාමික සම්ප්‍රදායන් තුළ ද දාවිත් ගෞරවනීයත්වයක් උසුලයි.<br /> <br /> බෙත්ලෙහෙමෙහි (Bethlehem) ජෙසීගේ (Jesse) කණිෂ්ඨ පුත්‍රයා ලෙස දැක්වෙන දාවිත් ඔහුගේ නිර්භීතභාවය සහ සංගීතයට වූ ලැබැඳියාව නිසා මෙන් ම ගොලියාත් (Goliath) නම් වූ ෆිලිස්ටයින් ගෝත්‍රික (Philestine) යෝධයා පරාජය කිරීමේ කීර්තියට ද හිමිකම් කියයි.<br /> <br /> සිය ජනප්‍රියත්වය හේතු කොට ගෙන ඊශ්‍රායෙල් රාජ්‍යයෙහි ප්‍රථම රජු වූ සාවුල්ගේ (Saul) සේවයට බැඳෙන දාවිත්, සාවුල්ගේ දියණිය වූ මීකල් (Michal) විවාහ කොට ගන්නා ලදී. දාවිත්ගේ ජනප්‍රියත්වය තර්ජනයක් ලෙස සැලකූ සාවුල් පසුකලෙක ඔහු සිය රාජ්‍යයෙන් නෙරපනු ලැබීය. දාවිත්ගේ පිටුවහල් දිවිය ගෙවුනේ තම දේශපාලන මාර්ගය ස්ථාවර කර ගැනීමේ අභිප්‍රායයන් ගෙනි. අනතුරුව ෆිලිස්ටයින්වරුන්ගේ ගාත් (Gath) නම් වූ ප්‍රදේශීය පාලන ප්‍රදේශයේ රජු වූ අවිෂ්ගේ (Achish) සේවයට බැඳුණු දාවිත් හට සික්ලැග් (Ziklag) නගරයෙහි පාලක තනතුර හිමි විය. <br /> <br /> ෆිලෙස්ටයින්වරු සමඟ වූ සටන්වලින් සාවුල් සහ එක් පුත්‍රයෙකු හැර සෙසු පුත්‍රයන් ජීවිතක්ෂයට පත් වීමත් සමඟ දාවිත් ජුදාවට සම්ප්‍රප්ත විය. (Hebron) හෙබ්රොන් නගරයේ ද ජුදාවේ රජු ලෙස කිරුළු පැළඳි දාවිත් හට ජුදාවේ විසූ ගෝත්‍ර කොටම්වලින් විරෝධතාවක් පැණ නොනැඟුණේ ඔහු සියුම් ලෙස ගෝත්‍රවල අභ්‍යන්තර ගතිකත්වයන් හඳුනා ගැනීම හේතුවෙනි. සාවුල්ගේ ජීවත් ව සිටින එකම පුතු හෙවත් ජුදාවේ රජකමට උරුමකරුවා වූ ඉශ්බාල් (Ishbaal) පරාජයට පත් කළ දාවිත් මුළු මහත් ඊශ්‍රායෙලයේ ම රජු බවට පත් විය.<br /> <br /> එසේ ම සාර්ථක ලෙස ෆිලිස්ටයින්, මොආබයිට්ස් (Moabites), ආරාමියනස් (Aramaeans), ඉඩොමයිට්ස් (Edomites) සහ අමොනයිට්ස් (Ammonites) යන ජන කොටස් මර්ධනයට කළ දාවිත් ඊශ්‍රායල් දේශසීමා ශක්තිමත් කොට වඩා පුළුල් කරන ලදී. ජෙබුසයිට්වරුන්ගේ (Jebusite) ග්‍රහණයෙහි වූ ජෙරුසලම (Jerusalem) අල්ලා ගත් දාවිත් එය සිය රාජ්‍යයෙහි අග නගරය බවට පත්කොට ගෙන යුදෙව්වන්ගේ අග්‍ර ආගමික සලකුණ වූ දෙවියන් වහන්සේගේ ගිවිසුම් පෙට්ටිය (The Scared Arc of Convenant) නගරයෙහි තැන්පත් කළේ ය. මෙමඟින් ඔහු ජෙරුසලම් නගරය සිය රාජයයෙහි ආගමික හා දේශපාලනික කේන්ද්‍රස්ථානය බවට පත් කරන ලදී. <br /> <br /> රබාත් (Rabbath) (වත්මන් ජෝර්දානයේ අම්මාන් නගරය (Amman, Jordan)) යටත් කර ගැනීමේ සටනේ යෙදී සිටිය දී දාවිත් බැත්ෂෙමා (Bathsheba) නම් වූ වැන්දඹු කතක් සමඟ අනියම් ප්‍රේමයක් ඇති කර ගන්නා ලදී. බැත්ෂෙබාගේ ස්වාමි පුරුෂයා වූ උරියාගේ (Uriah) මරණයට අනියම් ලෙස වගකිව යුතු වීමත් නිසා මෙම සම්බන්ධය දාවිත් තම ජීවිතයෙහි කර ගත්තා වූ ප්‍රධානතම පාපය ලෙස පිළිගැනෙයි.<br /> <br /> දාවිත්ගේ දේශපාලන ජීවිතය පවුල් ආරවුල් සහ කැරළිවලින් පිරුණක් විය. සිය රාජ්‍යය ගොඩ නැගීමේ දී විවිධ ගෝත්‍රික කොටස් එකමුතු කිරීමේ උපාය මාර්ගයක් ලෙස දාවිත් ඒ ඒ ජන කොටස්වලින් කාන්තාවන් විවාහ කර ගැනීම නිසා බිහි වූ ඔහුගේ ම දරුවන් අතර විවිධ නොසන්සුන්තාවන් ගොඩ නැගෙන්නට විය. දාවිත්ගේ තෙවන පුත් අබ්සොලොම් (Absalom) සමඟ සිය සොයුරිය දූෂණය කිරීම නිසා ගැටුමක් ඇති කර ගන්නා දාවිත්ගේ වැඩිමහල් පුත් අම්නොන් (Amnon) එම සටනින් මරු මුවට පත් වේ. ඉන් කලකට පසු දාවිත්ට එරෙහිව කැරැල්ලක් මෙහෙවන අබ්සොලම් දාවිත් සිහසුනෙන් නෙරපා දැමුව ද නැවත සටනට පැමිණෙන දාවිත්ගේ හමුදාවන් අතින් මරණයට පත්වේ. මෙකී සිදුවීම් දාමය දාවිත් මහත් සේ පීඩාවට පත් කරවී ය. අනතුරුව සිය පුතුන් අතරින් ජීවත් ව සිටින වැඩිමහල් පුතයා වන අදෝනියා (Adonijah) වෙනුවට බැත්ෂෙමා සමඟ වූ අනියම් ඇසුරෙන් බිහි වූ සොලොමන් (Solmon) තම අනුප්‍රාප්තිකයා ලෙස නම් කිරීම නිසා තවදුරටත් ආරවුල් වර්ධනය විය. <br /> <br /> අභීත රණශූරත්වය සහ කැපී පෙනෙන නායකත්වය හේතුවෙන් දාවිත් යුදෙව් ජනයාගේ ආගමික සහ දේශපාලන ප්‍රවාහයෙහි නිර්මාතෘවරයා ලෙස සැලකුම් ලබයි.<br /> <br /> (කර්තෘ: [[චමරි ප්‍රියංගා එදිරිසිංහ]])<br /> <br /> (සංස්කරණය නොකළ) <br /> <br /> [[ප්‍රවර්ගය: හේබ්‍රෙව් සාහිත්‍යය]] <br /> <br /> [[ප්‍රවර්ගය: බයිබලය]] <br /> <br /> [[ප්‍රවර්ගය: ද]]</div>

Senasinghe