http://encyclopedia.gov.lk/si_encyclopedia/index.php?action=history&feed=atom&title=%E0%B7%83%E0%B7%9C%E0%B7%80%E0%B7%8F%E0%B6%BB%E0%B7%9A%E0%B7%83%E0%B7%8A_%E0%B6%BD%E0%B7%9D%E0%B6%B4%E0%B7%9D_%E0%B6%AF_%E0%B6%85%E0%B6%BD%E0%B7%8A%E0%B6%B6%E0%B6%BB%E0%B7%8A%E0%B6%9C%E0%B7%9A%E0%B6%BB%E0%B7%92%E0%B6%BA%E0%B7%8F 2026-05-06T13:29:11Z විකියෙහි මෙම පිටුව සඳහා ඇති සංශෝධන ඉතිහාසය MediaWiki 1.27.1 http://encyclopedia.gov.lk/si_encyclopedia/index.php?title=%E0%B7%83%E0%B7%9C%E0%B7%80%E0%B7%8F%E0%B6%BB%E0%B7%9A%E0%B7%83%E0%B7%8A_%E0%B6%BD%E0%B7%9D%E0%B6%B4%E0%B7%9D_%E0%B6%AF_%E0%B6%85%E0%B6%BD%E0%B7%8A%E0%B6%B6%E0%B6%BB%E0%B7%8A%E0%B6%9C%E0%B7%9A%E0%B6%BB%E0%B7%92%E0%B6%BA%E0%B7%8F&diff=6048&oldid=prev 2024-07-18T04:46:35Z

<p>&#039;(Albergaria, Soarez Lopo de). ඉන්දියාවේ පෘතුගීසි ප්‍රතිරාජවරයක...&#039; යොදමින් නව පිටුවක් තනන ලදි</p> <p><b>නව පිටුව</b></p><div>(Albergaria, Soarez Lopo de). ඉන්දියාවේ පෘතුගීසි ප්‍රතිරාජවරයකු වූ අල්පොන්සු ද ඇල්බුක'ක්ගෙන් (1509–1515) පසු ප්‍රතිරාජ තනතුරට පත් වුයේ මොහුය. පෘතුගීසි රදල කුලයක උපන් මෙතෙම 1515 සිට 1518 තෙක් එම ධුරය දැරීය. 1504 දී ලිස්බන් නගරයෙන් පෙරදිගට එවූ නාවික බලඇණියෙහි නායකයා වශයෙන් හේ කටයුතු කෙළේය. ඔහු අප්‍රිකාවේ යුද්ධ කාර්යයන්හි නිරත වී සිටි හෙයින් එහි දී ලත් අත්දැකීම් නිසාත් ඉන්දියාව ගැන ඔහු තුළ තිබුණු මනා අවබෝධය නිසාත් පෘතුගාලයේ දොන් මැනුවෙල් රජු විසින් ඉන්දියාවේ ප්‍රතිරාජ පදවියට පත් කරනු ලැබීය. ප්‍රතිරාජ පදවිය බාර ගත් මෙතෙම 1515 දී ඒඩන් නගරය අල්ලා ගැනීමට තැත් කළේය. ලංකාවේ බලකොටුවක් තනවන ලෙස ප්‍රතිකාල් රජුගෙන් අණලත් අල්බර්ගේරියා ක්‍රි.ව. 1518 දී සේනාවක් ද කොටුවක් තැනීමට අවශ්‍ය උපකරණ ද රැගෙන කොළඹ බලා යාත්‍රා කළ නමුත් චණ්ඩ මාරුතය නිසා ගාල්ලට ගොඩබැස ඉන් මසකට පසු කොළඹට පැමිණ කෝට්ටේ රජවාසලට නියෝජිතයකු යැවීය. කෝට්ටේ ධර්මපරාක්‍රමබාහු රජු හා අල්බර්ගේරියා අතර ඇති වූ සාකච්ඡාවෙහි දී කොළඹ කොටුවක් තැනීමට අවසර දෙන ලෙස කළ ඉල්ලීම ඉෂ්ට කිරීමට රජතුමා පොරොන්දු විය. මෙයට විරුද්ධ වූ මුස්ලිම්වරු පෘතුගීසීන් කෙරෙහි මහජනයාගේ සිත් බිඳුවා, නැවෙන් ගොඩ බට පෘතුගීසි නාවිකයන් කිහිපදෙනකු ද අල්ලා ගත්හ. පෘතුගීසි නැව්වලට වෙඩි තබන්නට ද පටන්ගත්හ. මින් කෝපයට පත් අල්බර්ගේරියා යුද්ධ සේනාවක් ගොඩ බස්වා කොළඹ අවට මුස්ලිම් ප්‍රදේශවලට ගිනි තබා කෝට්ටේ තෙක් සේනා මෙහෙයවා මුස්ලිම්වරුන්ගේ විරුද්ධත්වය ගැන ද නොසලකා කොටුව ඉදිකිරීමට පටන් ගත්තේය. එය නිම වූවායින් පසු දොන් ලොරෙන්සෝ ද අල්මේදා හා කලින් කළ ගිවිසුම් ස්ථීර කොට, පෘතුගාලයේ රජුට අවුරුදු පතා කුරුඳු පාරම් (බහාර්) හාර සියයක් ද රතුකැට බඳනා ලද මුදු විස්සක් ද ඇතුන් දහ දෙනකු ද දීමට කෝට්ටේ රජු පොරොන්දු වූ හෙයින් අල්බර්ගේරියා ද සිංහල රජතුමාගේ නැව් තොටවල් ආරක්ෂා කිරීමටත් රජතුමන් පරසතුරන්ගෙන් ආරක්ෂා කිරීමටත් එකඟ විය. ඉන්පසු හෙතෙම කොටුවේ අධිපති ධුරයට දොන් ජුවන් ද සිල්වේරා පත්කොට බල ඇණියක් ද නවත්වා ආපසු ගියේය. 1518 වන තෙක් හේ ඉන්දියාවේ ප්‍රතිරාජ ධුරය දැරීය.<br /> <br /> (සංස්කරණය: 1965)<br /> <br /> [[ප්‍රවර්ගය: පුද්ගල චරිත - ඉන්දියා ඉතිහාසය; ලංකා ඉතිහාසය; පෘතුගාල ඉතිහාසය]] <br /> <br /> [[ප්‍රවර්ගය: අ]]</div>

Senasinghe