"අන්තර්දශා" හි සංශෝධන අතර වෙනස්කම්

11:15, 20 ජූනි 2023 වන විට නවතම සංශෝධනය

එක් මහදශාවක් ඒ ඒ ග්‍රහයන්ගේ මහදශාවලට අයිති වර්ෂ සංඛ්‍යා ප්‍රමාණයට අනුව නවයකට බෙදීමෙන් ලැබෙන කොටස් අන්තර්දශා හෙවත් අතුරුදශා නම් වේ.

විංශෝත්තරී ආදී ඇතැම් දශාක්‍රමවල නවග්‍රහයන්ට වෙන වෙන ම අයිති මහා දශා නවයෙකි. වෘහත්පාරාශර හෝරාශාස්ත්‍රයෙහි දශා දෙසාළිසක් දැක්වේ. මේ හැම දශාවක ම අතුරුදශා සොයා ගනු ලබන්නේ එකම ක්‍රමයකින් නොවේ. යථෝක්ත දශා අතුරෙන් විංශෝත්තරි දශාව පමණක් බහුතර වශයෙන් ව්‍යවහාරයෙහි පවතී. එහි අන්තර්දශා ප්‍රමාණය දැනගන්නේ මෙසේය. යම්කිසි ග්‍රහයකුට අයිති මහාදශා වර්ෂ ගණන තුනෙන් ගුණකර අන්තර්දශාව දැනගත යුතු ග්‍රහයාගේ මහදශා වර්ෂ ගණනින් ද ගුණ කළ යුතුයි. ගුණිතයට ලැබෙන දින සංඛ්‍යාව මාස වර්ෂාදියට පමුණුවා ගත් කල වුවමනා ග්‍රහයාගේ අන්තර්දශා ප්‍රමාණය ලැබේ. නිදර්ශනයක් : සඳු මහදශාවේ ගුරුගේ අන්තර්දශාවට අයිති කාලය සෙවීමට සඳුගේ මහදශාවට අයිති වර්ෂ ගණන වූ 10 තුනෙන් ගුණ කළ විට 30ක් ලැබේ. එය ගුරුගේ මහදශා වර්ෂ ගණන වූ 16න් ගුණ කළ විට (30 × 16 = 480) දින 480ක් හෙවත් වර්ෂ 1 මාස 4ක් ලැබේ. මෙය සඳු මහ දශාවේ ගුරුගේ අන්තර්දශා කාලයයි. සෙස්ස ද මේ නයින් දතයුතුයි. රවිගේ නක්ෂත්‍ර (විංශෝත්තරී) මහදශාවේ අන්තර්දශා ලබා ගෙවී යන්නේ රවි - චන්ද්‍ර - කුජ - රාහු - ගුරු - ශනි - බුධ - කේතු - කිවි යන පිළිවෙළිනි. අන්තර්දශාවන්ට අනුව ඒ ඒ කාලවල ඇතිවන ඉෂ්ටානිෂ්ට ඵල විනිශ්චය කරනු ලැබේ.

(සංස්කරණය:1963)