"අන්ධ දෝෂ" හි සංශෝධන අතර වෙනස්කම්

12:11, 20 ජූනි 2023 වන විට නවතම සංශෝධනය

ශුභ මුහූර්ත යෙදීමේ දී දුරුකටයුතු දෝෂ විශේෂයකි.

අන්ධ වශයෙන් සලකනු ලබන නැකත් ලග්න ආදියෙන් ඇතිවන දෝෂ අන්ධ දෝෂ නම් වේ. හිරු සිටි නැකත පටන් නැකත් සතරක් අන්ධ යයි ද, ඊළඟ නැකත් තුන එකැස් යයි ද, එතැන් පටන් සයක් පූර්ණ දෘෂ්ටි යයි ද, ඊළඟ තුන එකැස් යයි ද, එතැන් පටන් සයක් පූර්ණ දෘෂ්ටි යයි ද, ඊළඟ තුන එකැස් යයි ද, අවසන් නැකත් තුන අන්ධ යයි ද මුහූර්ත චින්තාමණියේ දැක්වේ. අස්විද, බෙරණ, කැති, රෙහෙණ, මුවසිරස, අද, පුනාවස, පුෂ, අස්ලිස, මුල, පුවසළ, උතුරුසළ, සුවණ යන නැකත් දිවාකාලයෙහි අන්ධ බැවින් රාත්‍රි කාලයෙහි පමණක් ශුභ වැඩ සඳහා යෙදිය යුතු බවත් මා, පුවපල්, උතුරුපල්, හත, සිත, සා, විසා, අනුර, දෙට, දෙනට, සියාවස, පුවපුටුප, උතුරුපුටුප, රේවතී යන නැකත් රාත්‍රි කාලයෙහි අන්ධ බැවින් දිවා කාලයෙහි පමණක් ශුභ කර්ම සඳහා යෙදිය යුතු බවත් සදහන් වේ. මේ නැකත් පිළිබඳ මත භේද කීපයකි.

අව එකොළොස්වක පටන් තිථි සතරක් ද පුර පෑළවිය පටන් තිථි සතරක් ද අන්ධ තිථි නමින් හැඳින්වේ. මේවා ද අශුභ වශයෙන් සලකනු ලැබේ.

මේෂ, වාෂභ, මිථුන, කටක, ධනු, මකර යන ලග්න සය දිවාකාලයෙහි ද සිංහ, කන්‍යා, තුලා, වෘශ්චික, කුම්භ, මීන යන ලග්න සය රාත්‍රි කාලයෙහි ද අන්ධ ලග්නයෝ වෙති. දිවාකාලයෙහි අන්ධ ලග්න රාත්‍රිකාලයෙහි ද නිශා කාලයෙහි අන්ධ ලග්න දිවාකාලයෙහි ද ශෝභන ඵල ගෙන දේ.

(සංස්කරණය:1963)