"අසොෆ්" හි සංශෝධන අතර වෙනස්කම්

10:40, 3 දෙසැම්බර් 2024 වන විට නවතම සංශෝධනය

(අසොව්). මෙය සෝවියට් රුසියාවේ ඩොන් ගංමෝය අසල පිහිටි නගරයකි. ටාගන්රොග් බොක්කේ නැගෙනහිර වෙරළේ පිහිටි මෙය පුරාණ ග්‍රීක ජනපදයක් වූ ටැනෙයිස් නගරය පිහිටි ස්ථානයට සමීපය. 10 වැනි ශත වර්ෂයේ දී පළමුවැනි ව්ලැඩිමිර් විසින් ද 13 වැනි ශත වර්ෂයේ දී ජිනෝවා වාසීන් විසින් ද අල්ලා ගනු ලැබූ මේ නගරය එකල පෙර අපර දෙදිග වෙළෙඳ මධ්‍යස්ථානයක් විය. 1395 දී ටැමර්ලේන්ගේ (ටිමූර්ගේ) ප්‍රහාරයට ලක් විය. 1639 දී මහා පීටර් රජ ක්‍රිමියාව පරදවා එය අල්වා ගත්තේය. නැවත 1711 දී ක්‍රිමියාවේ තුර්කිවරුන්ට අයත්වුණු මෙනුවර 1739 දී රුසියාවට හිමි විය. වර්තමානයෙහි මාළු තොටක් වශයෙන් දියුණු වී ඇති මෙය කැස්පියන් මුහුද, අසොෆ් මුහුද සහ කළු මුහුද එකිනෙකට සම්බන්ධ කරන චොල්ගා-ඩොන් ජල මාර්ගය හේතු කොට ගෙන ඉතා වැදගත් නගරයක් බවට පත් වී තිබේ. මෙහි ජනගහනය (1935) 19,266කි.

(සංස්කරණය: 1965)