"ඇත්කෑල" හි සංශෝධන අතර වෙනස්කම්

15:14, 14 මැයි 2025 වන විට නවතම සංශෝධනය

(බුටෙයා සුපෙර්බා - Butea superba L). ලංකාවේ කඳුකර කැළෑවල දක්නට ලැබෙන මේ ශාකය කාෂ්ඨාරෝහකයකි. මධ්‍යම හා දකුණු ඉන්දියාවේ ද බුරුමයේ ද කඳුකර කැළෑවල ඇත්කෑල දක්නට ලැබේ. ගන සැරේට වැඩෙන මේ ශාකය ඊට ඉහළ නැගීමට ආධාර වන ගස් වසා තෙරපාගෙන මෙන් සිටී.

ඇත්කෑල මල් අඟල් 12ක් පමණ දිග ඒකාක්ෂවල හටගනී. ඒවා තද රතුපාටය. ඇත්තෑල මුල්වලින් හා ළපටි අතුවලින් ඉතා ශක්තිමත් කෙඳි වර්ගයක් ලැබේ. ඉන් කඹ අඹරා ගනිත්.

ඇත්කෑලවලට වැල්කෑල යයි ද කියනු ලැබේ. ඇත්කෑල ලෙගුමිනෝසේ කුලයට හෙවත් රනිල කුලයට අයත්ය. ලංකාවේ දක්නට ලැබෙන අනෙක් කෑල විශේෂය ගස්කෑල (බුටෙයා මොනොස්පෙර්මා) නමින් හැඳින්වේ. මෙය ඍජු ගසකි. ගස්කෑලවල ඒකාක්ෂ අඟල් 6ක් පමණ දිගය. මේ කෑල දෙවර්ගයේ ම කඳෙන් මැලියම් වර්ගයක් වෑස්සේ.

ආයුර්වේද මතය

ඇත්කෑල වැලෙහි මුල්, මල් හා පොතු සර්ප විෂට ප්‍රතිකාරයක් වශයෙන් ගනිති. මල් ගෝනුසු විෂට පිළියමකි.

මෙම වැලේ දඬු හා කොළ කෂාය අර්ශස් රෝගයට ඖෂධයක් වශයෙන් කාම්බෝජ වාසීහු පාවිච්චි කරති.

(සංස්කරණය: 1967)