දිව්‍ය සත්ප්‍රසාද වහන්සේ
දිව්‍ය සත්ප්‍රාසාදය ඉගැන්වීමේ සහ කිතුණු ජීවිතයේ කේන්ද්‍රීය ධර්මයයි. කායික ජීවිතයේ ප්‍රධාන අවස්ථාවන් ලෙස උපත, පෝෂණය වීම, වැඩිහිටි වියට පත් වීම, විවාහ වීම හෝ පැවදි වීම, රෝග වැළදීම හෝ මිය යාම ද වශයෙන් හඳුන්වා දිය හැකි ය. අධ්‍යාත්මික ජීවිතය ඊට සමාන්තරව වැඩෙන පිණිස ඒ අවස්ථාව මුල් කොට ගෙන ප්‍රසාද නිධාන ස්ථාපිත කර ඇත. දිව්‍ය සත්ප්‍රාසාදය ප්‍රසාද නිධානයකි. (ප්‍රසාද නිධානය බ.)
දිව්‍ය සත්ප්‍රාසාදය සර්ව බලැති දෙවියන් වහන්සේට මවනු ලැබූවන් ලෙසට දක්වන උත්තුංග නමස්කාරය හා ස්තෝත්‍ර ප්‍රශංසාව ද වේ. මෙලොවින් ඉවත් වී යාමට පෙර ක්‍රිස්තූන් වහන්සේ පූප හා මිදි රස ද දෑතට ගෙන ඒවා තමන් වහන්සේගේ ශරීරයත් රුධිරයත් බවට පත් කළ සේක. ඒ බව පැහැදිළිව ම ප්‍රකාශ කළ එතුමෝ තමන් සිහිවීමත් වශයෙන් නැවත නැවතත් එසේ කරන ලෙස තම ගෝලයනට නියම කළ සේක. දිව්‍ය පූජාව යනුවෙන් පැවැත්වෙන පිළිවෙත එහි අනුකරණයයි. ක්‍රිස්තූන් වහන්සේගේ ගෝලයන් ලද අවසරය අනුව ඊට නියමිත පිළිවෙත් සිදුකිරීමෙන් පූප හා මිදි රස ද සමිඳුන්ගේ ශරීරය හා රුධිරුය ද බවට පරිවර්තනය කරනු ලැබේ. මෙසේ පරිවර්තනය වන පූපයත් මිදි රසත් ‘දිව්‍ය සත්ප්‍රසාදය’ යනුවෙන් විස්තර කෙරේ. දිව්‍ය සත්ප්‍රසාදය තුළින් ක්‍රිස්තූන් වහන්සේ අප අතර ජීවමානව වැඩ සිටින බව විශ්වාස කෙරේ. දිව්‍ය පූජාව මඟින් ක්‍රිස්තූන් වහන්සේ අප සඳහා පිදූ ජීවිත යාගය ද අනුස්මරණය කරනු ලබන්නේ ය. කුරුසිය මත ලේ වැගිරීමෙන් තොරව එම කුරුසියේ යාගය ම පුදනු ලබන්නේ ය.
දිව්‍ය සත්ප්‍රාසාදය කතෝලික වන්දනාවේ කේන්ද්‍රස්ථානය හිමිවන්නේත් අන් සියලු ම වන්දනාවනට ඉහළින් එය සලකනු ලබන්නේත් ක්‍රිස්තූන් වහන්සේ ම දිව්‍ය සත්ප්‍රාසාදය තුළ වැඩ සිටින නිසා ය. 1. පාස්කු භෝජනය - PASHAL MEAL සෑම වසරක ම (මාර්තු-අප්‍රේල්) 15 වන දින පවත්වන විමුක්තිදායක ගමන සිහි කරයි.
2. මාක්: 14: 22 - 24, ලූක්: 22: 14 - 38, මතෙව්: 26: 26 - 28, 1 කොරෙන්ති 11: 23 - 25
එදා ආරම්භක අවස්ථාවෙහි දී ජේසුතුමාගේ ආයාචනය වූයේ මා සිහි වීම පිණිස මෙය පානය කරන්න යන්න ය. ඒ අනුව ජේසුතුමා ජීවිත අරමුණ සිහිවටනක් වශයෙන් පැවැත්වීම ය. එනම් එතුමාගේ මරණය හා උත්ථානය ජීවමාන ව සිහි කරමින් එම ජීවිත පූජාවට ඇදහිලිවන්තයිනට සහභාගී වීමට අවස්ථාව ලබාදීමයි. අද කිතුණුවන් දිව්‍ය පූජාව මඟින් ජේසුතුමා එම ඉල්ලීමට අනුකූලතාවය දක්වයි. දිව්‍ය සත්ප්‍රාසාදය සමගි කිරීමේ යාගයකි. ජේසුතුමා කුරුසිය මරණයට හා සබැඳි ජීවිත පූජාවකි. අද එම යාගය සංකේතාත්මකව පූප හා මිදි රස මඟින් ලේ හැලීමකින් තොරව දෙවියන් වහන්සේට ඔප්පු කරනු ලබයි. පාපය නිසා පළුදු වන දෙවි මිනිස් සබඳතා නැවත ගොඩනැගීමට රුකුල් දෙන අවස්ථාවකි. ශුද්ධ වූ සභාව දිව්‍ය සත්ප්‍රාසාදීය පිළිවෙත සිදුකිරීම තුළින් ක්‍රිස්තූන් වහන්සේ පිළිබඳ විශ්වාසය ප්‍රකාශ කරමින් ජේසුතුමාගේ ස්වාමීත්වය ප්‍රකාශ කරමින් දේව රාජ්‍යයේ සම්ප්‍රාප්තිය අපේක්ෂා කරයි. දිව්‍ය සත්ප්‍රාසාදීය විශ්වාසය තුළ ක්‍රිස්තූන් වහන්සේ හා සම්බන්ධ වීමෙන් එකමුතුකම ගොඩනැංවීමට හේතුවක් වෙයි.
1. (ලූක් 22/19-කොරි:11-26)
දිව්‍ය සත්ප්‍රාසාදය කිතුණු බැතිමත්හු ක්‍රිස්තූන් වහන්සේගේ ගැලවීමේ යාගය සිහි කරන අතර තමනට ජීවය ලබා දුන් දෙව්පියාණන්ට යාගයක් වශයෙන් ද පුද කරන්නට කටයුතු කරති. එම යාගයට පූර්ණ වශයෙන් පංගුකාරයන් වන විශ්වාසකයින් පූප හා මිදි රස මඟින් ජේසුතුමාව ලබා ගනියි. එවිට දිව්‍ය සත්ප්‍රාසාදය ආහාරයකි. පානයකි. කිතුණු දිවිය පෝෂණය කරන භෝජනයන් ද වෙයි. එලෙස එම පානයට පංගුකාරයින් වන කිතුණුවන් අතර බැඳීමක් ගොඩ නැගෙයි.
2. එය සහෝදරත්වයේ උල්පත වෙයි. මේ අනුව දෙවන වතිකානු කතිකාවේ ජනවන්දනාව පිළිබඳ ප්‍රකාශය දිව්‍ය සත්ප්‍රාසාදයේ උල්පත හා උච්ඡතම අවස්ථාව නිර්ණය කරයි.
දිව්‍ය සත්ප්‍රාසාදය ඉදිරියේ අප හැමදෙනා ම එකම ශරීරයක් නොවන්නේ නම් එහි ප්‍රකාශ කරන ගැඹුරු යථාර්ථයට පටහැනි වීමයි.
දිව්‍ය සත්ප්‍රාසාදය සභාවේ උතුම්ම යාචඤා මෙහෙයයි. ඒ තුළ දේව වන්දනාව, ස්තෝත්‍ර ප්‍රකාශ වෙයි. එ මගින් භේදයට ඉඩක් නැත. ජාති, කුල, වර්ණ, ගෝත්‍ර භේද සියල්ල ඉක්මවා යමින් සියලු විශ්වාසකයින් අතර සමගිය ඇති කරන පරාර්ථකාමී ජීවයක් ලබා දෙයි. මානව දයාව මෙන් ම ක්‍රිස්තුතුමන්ගේ ජීවිතය මඟින් ඇරඹූ විමුක්තිදායක ක්‍රියාවලිය සමාජය තුළ අත්‍යන්ත ව පවත්වා ගෙනයාමට දිව්‍ය සත්ප්‍රාසාදය මඟ විවෘත කරයි. ජේසුතුමාගේ ජීවිතය, මරණය හා උත්ථානය අන් අයට ආලෝකයක් විමුක්තියක් වූවා සේ ම එම කටයුත්ත අද කිතුණු බැතිමතුන් දිව්‍ය සත්ප්‍රාසාදයට හවුල් වීමෙන් එම විමුක්තිදායක ක්‍රියාවලිය දිගට ම කර ගෙන යාමට ඇප කැපවීමත් ඇතුළත් ය. මිනිසා තුළ ගොඩනැගෙන වහල් බැමිවලින් මුදා නිදහස තහවුරු කරමින් පුද්ගල සන්තුෂ්ටිය පමණක් නොව පොදු සාමුහික වශයෙන් යුක්ති ගරුකව බෙදා හදා ගන්නට සහෝදරත්වයේ ජීවිතයකට මං පෙත විවෘත කරයි.
අශ්‍රිත ග්‍රන්ථ
1. ආචාර්ය ලෙස්ලි ප්‍රනාන්දු - දිව්‍ය සත්ප්‍රාසාදය - 1986 - කොළඹ
2. පර්ල් ලාල් විජේසේකර - ජන දෙව් දහමක් සඳහා බයිබලීය සංකේත පිට 48 - 52 - 1993 - කොළඹ
3. THE NEW JEROME BIBLICAL COMMENTTARY (Eds) Raymond Brown J. A. FITZMYER, R. E. MURPHY - NEW DELHI - 1990
4.Cathol c Encyclopoedia Ed. PETER STRAVINSKAS - 1991 - INDIANA.
5. VATICAN COUNCIL II - A FLANNERY - 1957 - BOMBAY.
6. R. P. MCBRIEN CATHOLICISM - LONDON - 1984
7. L OTT. FUNDAMENTAC OF CATHOLIC DOGINA - CORK IRELAND. 1966 (7th Ed.)
8. DICTIONARY OF BIBLICAL THELOGY (Ed) X LEON - DUFOUR. BANGALORE - 73.
(කර්තෘ: රීඩ් ෂෙල්ටන් ප්‍රනාන්දු පියතුමා: 1993)
(සංස්කරණය නොකළ)
