අතරවාර ආණ්ඩුව
මහජන ඡන්දය මඟින් මහජනයාගේ විශ්වාසය ලැබ සිටින ආණ්ඩුවක් කිසියම් කරුණක් හේතුකොට විසුරුවා හරිනු ලැබීමත් නැවත මැතිවරණයක් පවත්වා අලුත් ආණ්ඩුවක් පිහිටුවීමත් යන මෙදැතුර රාජ්‍ය පාලන කටයුතුවලට බාධාවක් නොමැති සේ ඒවා සිසි ලෙස කරවාගෙන යෑමට ඇති කරනු ලබන භාරකාර ආණ්ඩුවකි. 1959 අගහරියේ දී මහජන එක්සත් පෙරමුණේ ආණ්ඩුව පිහිටුවන තෙක් ඒ අතර ඇතිවුණු මහාමැතිවරණ කාලය ගෙවෙන තුරු ඩබ්ලිව්. දහනායක මහතාගේ නායකත්වයෙන් පැවැතුණු භාරකාර ආණ්ඩුව අතරවාර ආණ්ඩුවකි.
අතරවාර ආණ්ඩුව සමන්විත වනුයේ එක් ප්‍රධානියකුගෙන් සහ ඔහු යටතේ රාජ්‍ය දෙපාර්තමේන්තුවල වැඩ පාලනය කිරීමට අවශ්‍ය ඇමතිවරුන් සුළු ගණනකින්ය. එවක පවත්නා පාර්ලිමේන්තු නීති අණපනත් අනුව පාලන කටයුතු හා එදිනෙද්‍ර රජයේ වැඩ කටයුතු පවත්වා ගෙන යෑමය, මොවුන් විසින් කළයුත්තේ, අලුතෙන් නීති සම්පාදනය කිරීමට බලයක් ඔවුන්ට නැත. මක්නිසාද යත්, පාර්ලිමේන්තු‍ව විසුරුවා හැරීමෙන් පසු නීති සම්පාදක මණ්ඩලයක් නැති හෙයිනි.
(සංස්කරණය:1963)
