අප්පර් ස්වාමි

(600-681). මෙතුමා සත්වන සියවසේ දකුණු ඉන්දියාවේ ජීවත්වූ ශෛව ආචාර්යවරයෙකි. කාංචිපුර පළමුවන මහේන්ද්‍ර පල්ලව මහරජතුමාගේ සමකාලිකයෙකි. ක්‍රි.ව.600 දී පමණ දකුණු ආර්කොට් දිස්ත්‍රික්කයේ ගමක පොහොසත් වෙල්ලාල පවුලක මෙතුමෝ උපත ලැබූහ. දෙමාපියන් විසින් මෙතුමාට පළමුවෙන් ම තැබූ නම මරුණික්කියාර්ය. අප්පර් ස්වාමි තුමා තිරුනාවුක්කරසු නායණාර් යන නමින් ද ප්‍රකටය. මුලින් ශිව භක්තිකයකුව සිටි මෙතුමා ඊළඟට ජෛන සමය වැලඳ ගත්තේය. එහෙත් නැවත වරක් එතුමා තමාගේ මවුපිය පරපුරෙන් හිමි වූ ශිව ආගම දැඩි ලෙස වැළඳ ගත්තේය. මේ බව දැනගත් එතුමාගේ ජෛන හිතමිතුරෝ, නැවත එතුමා ජෛන ආගමට හරවා ගැනීමට පල්ලව රජ තුමාගෙන් පවා උදව් ඉල්ලූහ. එහෙත් රජතුමාගේ තර්ජනවලින් ද පලක් නොවීය. ජෛන ‍භක්තිකයකු වූ මහේන්ද්‍රපල්ලව රජතුමා පවා මොහුගේ දේශනා ගැන පැහැදී ශිව වැලඳ ගත් බව දැක්වේ.

එකල ළදරු ස්වාමිවරයකුව සිටි තිරුඥාන සම්බන්ධර් තුමා මෙතුමාට අප්පා (පියා) යනුවෙන් ඇමතීමට පුරුදුව සිටියේය. මේ නිසා ඉන්පසු එතුමා “අප්පර්” යන නමින් ප්‍රසිද්ධ විය. වයස අතින් සම්බන්ධර් ස්වාමි හා අප්පර් ස්වාමි අතර ලොකු වෙනසක් තුබුණු නමුත් මේ දෙදෙනා සුහද මිත්‍රයෝ වීහ.

අප්පර්තුමා ගත කළේ ඉතා චාම් දිවිපෙවෙතකි. එතුමා වෙල්ලාල කුලයට අයිති වූ නමුත් වැඩි වශයෙන් ඇසුරු කළේ කුලහීන, සාමාන්‍ය දුප්පත් ජනයාය. සිව්පාවුන් හා කුරුල්ලෝ පවා එතුමා සමඟ මිතුරුව කල් ගෙවූහ.

එතුමා ශිව දෙවියන් වෙනුවෙන් භක්ති ගීතිකා 49,000ක් පමණ කළ බැව් කියතත්, එයින් අපට දැනට ලැබී ඇත්තේ 313ක් පමණකි. තේවාරම් නම් වූ සුප්‍රසිද්ධ ශෛවාගමික ද්‍රවිඩ ග්‍රන්ථ හතෙන් තුනක් අප්පර් ස්වාමි විසින් කරන ලදි.

(සංස්කරණය:1963)