අබු මෙර්වාර් අබ්දුල් මාලික් ඉබ්න් ශෝර්
(1090–1162). අරාබි වෛද්යවරයකි. යුරෝපීය වෛද්යවරයන් අතර ඇවන්ශෝඅර් නමින් ප්රකට වූ මෙතෙමේ කීර්තිධර වෙද පරපුරකින් පැවතෙන්නෙක් විය. ඉබ්න් ශෝර් ගේලන්ගෙන් පසු පහළ වූ මහා වෛද්යවරයා ලෙස ද අත්හදාබැලීමෙන් වෛද්ය විද්යාව හැදෑරීමේ ක්රමයට මුලපිරූ තැනැත්තා වශයෙන් ද සැලකිණි.
ස්පාඤ්ඤයේ සෙවිල් අසල ප්රදේශයක උපන් මොහු මහාදාර්ශනිකයකු වූ අවරෝඊස්ගේ සමකාලිකයෙක් ද ඔහුගේ කුලුපග මිත්රයෙක් ද වූයේය. ඉබ්න් ශෝර් තම කිතාබ් අල්-තාසිර් නමැති වෛද්ය ග්රන්ථය කළේ ද අවරෝඊස්ගේ ආරාධනයෙන් බව පැවැසේ. හේබ්රෙව්, ලතින් යන භාෂාවනට පරිවර්තනය කර ඇති එම ග්රන්ථය යුරෝපීය වෛද්ය විද්යාවෙහි ලා බෙහෙවින් බල පා ඇත. දෛවඥයන්ගේ ප්රතිකර්මවල නිරර්ථකභාවය සම්බන්ධව පිරියෙසුම් කළ හේ ශායනික විස්තර ඉදිරිපත් කිරීමෙහි ලා සාමර්ථ්යයක් දැක්වීය. පරිකන්තුදාහය, අන්තක ටියුබර්කුලෝසියාව, ග්රසනික ආඝාතය ආදි රෝගයන් පිළිබඳ විස්තර විභාග ද දැක්වීය.
(සංස්කරණය: 1970)
