අරුබ්
(අරබ). අනුරාධපුර යුගයේ දී සිංහල ආණ්ඩුවේ භාණ්ඩාගාරයේ මුදල්හදල් භාරව සිටි සුළු නිලධාරියෙකැයි සිතිය හැකිය. මේ යුගයේදී ලංකාවේ ප්‍රධාන විහාර හා ආරාමයන් සතු දේපළ භාරව සිටි තැනැත්තන් ද හැඳින්වුණේ අරුබ් යන නමින් බව පෙනේ. ඇතැම් සෙල්ලිපිවල සඳහන් වන අරබ යන්නෙන් ද හැඳින් වුණේ මේ නිලධාරීන් ම බව පරණවිතාන මහතා අදහස් කරයි. අරබ යන්න "අර්ප්‍ය" යන සංස්කෘත වචනයට සමාන බව ඒ මහතා පවසයි. මේ අනුව අරබ හෝ අරුබ් යන වචනයන්ට ලැබෙන තේරුම භාරකාරයා යනුයි.
සිව්වන හෝ පස්වන සියවසට අයත් යයි සැලකෙන හිඟුරේගල සෙල්ලිපිය අරුබයන් ගැන සඳහන් වන පැරණි ම ලිපිය වශයෙන් සැලකිය හැකිය. අටවන සියවසට අයත් යයි සැලකෙන විරඳගොඩ ටැම්ලිපියෙහි ද දසවන සියවසට අයත් යයි සැලකෙන පොළොන්නරු රාජ සභා මන්දිර ලිපියක ද විහාරගම ටැම්ලිපියක (දසවන සියවස) මැද උල්පොත ටැම්ලිපියක ද (දසවන සියවස) මේ නිලධාරීන් ගැන සඳහන් වෙයි. අනුරාධපුර යුගයේ අවසාන කොටසට අයත් වන මේ සෙල්ලිපිවල අරුබයන් ගැන සඳහන් වෙතත් මොවුන්ට පැවරී තුබුණු කටයුතු කවරේ දැයි නිශ්චය කිරීමට මේ ලිපි වලින් ලැබෙනතොරතුරු ප්‍රමාණවත් නොවේ. එහෙත් මොවුන් එක සේවයකට ම කැපවී සිටි නිලධාරීන් පිරිසක් නොවූ බව යට දැක්වූ සෙල්ලිපිවල අරුබ් යන්නට මුලින් යෙදී ඇති මොවුන්ගේ සේවය හඟවන පදයන්ගෙන් පෙනේ.
(සංස්කරණ්‍ය: 1965)
