අහෝබල
සතළොස්වන ශතවර්ෂයෙහි උත්තර භාරතයෙහි විසූ සංගීත ශාස්ත්‍රඥයෙකි. වීණාවේ ශුද්ධ සහ විකෘත ස්වර ස්ථාපනය කරන අයුරු පළමුකොට ම විග්‍රහ කළ භාරතීය සංගීතාචාර්යයවරයා වන මෙතෙම සංගීත ග්‍රන්ථ රචකයෙක් ද විය.
අහෝබලගේ පියා ශ්‍රී කෘෂ්ණ නමැත්තෙකි. අහෝබල ශ්‍රී නිවාස හා භාවභට්ට යන දෙදෙනාට කලින් ජීවත් වූයේය. ඔහුගේ සංගීතපාරිජාන නම් ග්‍රන්ථය 1650 දී පමණ ලියැවුණක් සේ සැලැකේ. වර්තමාන හින්දුස්ථානි සංගීතයෙහි ප්‍රාමාණික ග්‍රන්ථයක් වශයෙන් සැලැකෙන සංගීත පාරිජාතය සංස්කෘත භාෂාවෙන් ලියැවුණු කුඩා කෘතියකි.
මෑත යුගයේ දී ලියැවුණු ඉතා විශිෂ්ට භාරතීය සංගීත ග්‍රන්ථය වශයෙන් පිළිගනු ලබන සංගීත පාරිජාතයෙහි ස්වර, ග්‍රාම, මූර්ඡනා, ගමක, ශුද්ධ ස්වර, වීණා වාදන ක්‍රම, ගීත, රාග යන කරුණු විස්තර වේ. අහෝබල එක් සිය විසි රාගයෙක වාදන ක්‍රම දක්වයි. පැරැණි සම්ප්‍රදායත් නව ශෛලියත් එක් කිරීමෙහි ප්‍රබල පුරුකක් වූ මොහුගේ සංගීතපාරිජාතය උතුරු ඉන්දියාවේ අතිශයින් ජනප්‍රියය. මෙය 1724 දී දීනනාථ නමැත්තකු විසින් පර්සියානු බසට නඟන ලදි.
(සංස්කරණය: 1965)
