ආරණාල

පොතු බැහැර කොට මැනැවින් සකස් කළ අමු තිරිඟුවලින් සෑදූ කැඳවලට ආරණාල යයි කියනු ලැබේ. ආරණාලය ඇඹුල් රසයෙන් යුක්ත වූ කල එය ධාන්‍යාම්ල නම් වේ. සැටදා හැල් සහලින් බත් පිස එය දිය දෙතිස් නැළියක බහා පොඩිකොට බඳුන පියනකින් වසා සතියක් තබා මිරිකා පෙරා ගත් ද්‍රව ද ආරණාල නමි. සෞවීරාම්ල යනු ද ඊට නමකි. ආරණාල භේදකයි. තියුණු හා උෂ්ණයි. පිත ශුද්ධ කරයි. වස්ති ශෝධකයි. රුචිකරයි. ආග්නේය ගුණයෙන් යුක්තයි. විඩා දුරු කරයි. ශෝෂ, මූර්ඡා, භ්‍රම යන උපද්‍රව ඇත්තවුන්ට හා මත්ගතිය, කැසීම්, කුෂ්ඨ, රත්පිත ඇතියවුන්ට අපථ්‍යයි. පාණ්ඩු, යක්ෂ්මා, ශෝථ යන රෝගයන්ට ද පථ්‍ය යි.

(සංස්කරණය: 1965)