ආල්ගාර්වේ

දකුණු පෘතුගාලයේ පැරණි රාජධානියක් හා පළාතක් මෙනමින් හැඳින්වේ. 8 වැනි සියවසේ සිට 13 වැනි සියවස දක්වා පිළිවෙළින් කෝර්දෝවා හා සැවීල්හි කාලිප්වරුන් යටතෙහි පැවති මෙය 1253 දී තුන්වැනි අල්පොන්සෝ රජු විසින් පෘතුගාලයට ඈඳා ගන්නා ලදි. 'පෘතුගාලයේ හා ආල්ගාර්වේහි රජ' යන පදවි නාමය පළමුවෙන් ම ව්‍යවහාර කරනු ලැබූයේ මෙම අල්පොන්සෝ රජු විසිනි. ආල්ගාර්වේ මුහුදු සටන් පිළිබඳව ප්‍රසිද්ධියක් උසුලයි. 15 වැනි ශතවර්ෂයේ දී නාවික හෙන්රි විසින් සග්රෙෂ් තුඩුවෙහි පිහිටුවූ නාවික පාසැල නිසා ආල්ගාර්වේ වඩාත් ප්‍රසිද්ධියට පත්වූයේය.

වර්තමාන ෆාරූ දිස්ත්‍රික්කය පිහිටා ඇත්තේ මෙම පැරණි රාජධානියට අයත්ව තිබුණු භූමි භාගයේය.

(සංස්කරණය: 1965)