ආලෝක වර්ෂය
(Light Year). මෙය දුර මැනීම සඳහා නක්ෂත්‍ර විද්‍යාවේ භාවිත කරනු ලබන දුර මනින ඒකකයකි. එක වර්ෂයක දී ආලෝකය ගමන් කරන දුර ප්‍රමාණයට ආලෝක වර්ෂය යයි කියනු ලැබේ. ආලෝකයේ ප්‍රවේගය තත්පරයට සැතපුම් 186,000ක් හෙවත් කිලොමිටර 300,000ක් පමණ වේ. එහෙයින් එක් වර්ෂයක දී ආලෝකය සැතපුම් 5,880,000,000,000ක් හෙවත් කිලොමීටර 9,461,000,000,000ක් පමණ දුර ප්‍රමාණයක් ගමන් කරයි. එබැවින් එක ආලෝක වර්ෂයක් යැයි දක්වන්නේ සැතපුම් කෝටි පන්ලක්ෂ අසූ අටදාහක පමණ දුර ප්‍රමාණයකි.
නක්ෂත්‍රවිද්‍යාවේ හමු වන විශාල දුර ප්‍රමාණ ප්‍රකාශ කිරීමට භාවිත කරනු ලබන ක්‍රම අතුරෙන් ආලෝක වර්ෂය සාමාන්‍ය ක්‍රමයකි. තාරකාවක දුර සාමාන්‍යයෙන් ප්‍රකාශ කරනු ලබන්නේ ආලෝක වර්ෂ සංඛ්‍යාවෙනි. අනෙක් නක්ෂත්‍ර ඒකක සමග මෙය සසඳා බලන කල අපට මෙසේ පෙනේ:
ආලෝක වර්ෂ 1 = නක්ෂත්‍ර ඒකක 63,300
පාර්සෙක් 1 = ආලෝක වර්ෂ 3.26
(නක්ෂත්‍ර ඒකක බලනු.)
(සංස්කරණය: 1965)
