ආෆියුන් කාරාහිසාර්
බටහිර තුර්කියෙහි ආෆියුන් කෝරළයෙහි ප්‍රධාන නගරය වන කාරාහි සාර් සහීබ්, ආෆියුන් කාරාහිසාර් නමින් ප්‍රසිද්ධියට පත්ව ඇත. ස්මර්නා නගරයට සැතැපුම් 200ක් පමණ නැගෙනහිරින් වූ මෙම නගරය මුහුදු මට්ටමේ සිට අඩි 3,500ක් උස්වූ කඳුකර ප්‍රදේශයක කපොල්ලක පිහිටි හෙයින් පුරාණයේ පටන් ම ඒ ඔස්සේ වැටී තිබුණු වෙළෙඳ මාර්ග ආශ්‍රයෙන් දියුණු විය. නගරයට නුදුරුව ම පිහිටියා වූ ද මුහුදු මට්ටමේ සිට අඩි 700ක් උස් වූ ද යමහල් පාෂාණමය කූටයක බයිසන්ටයින් කාලයේ දී මහබලකොටුවක් සාදා තිබිණ. මෙම බලකොටුවෙහි හා ඒ සමඟ පැවති මාළිගයක නටබුන් දැනුදු එහි ඇත. තුන් වැනි ලියෝ නම් වූ බයිසන්ටයින් රජ ක්‍රි.ව. 740 දී අරාබීන් පරාජය කළ පසු මෙම නගරය නිකොපොලිස් යැයි නම් කළේය. පසු කාලයේ දී සෙල්ජූක් තුර්කිවරු මෙය ආෆියුන් කාරාහිසාර් යැයි නම් කළහ. තුර්කි රාජ්‍යය පිහිටු වූ ඔස්මාන්ගේ ජන්ම භූමිය මෙය විය.
නගරය අවට පෙදෙස්වල අබිං වැවීම ඉතා දියුණුය. නගරයේ ප්‍රධාන ම වෙළෙඳ ද්‍රව්‍යය ද අබිංය. බුමුතුරුණු සෑදීම හා සම් බඩු සෑදීම ද නගරයේ දියුණු කර්මාන්ත වේ. ආෆියුන් කාරාහිසාර්හි ජනගහනය (1950) 29,881කි.
(සංස්කරණය: 1965)
