ඇත්පන්තිය

මහනුවර සමයෙහි සිංහල රජදරුවන්ගේ ඇතුන් බැඳි ස්ථානය මෙනමින් හැඳින්විණැයි කියත්. මෙවැනි ඇත්පන්තියක් හඟුරන්කෙත වූ බවට සාධක වශයෙන් එහි ඇති ඇත්පන්තියේ වත්ත නමැති ඉඩම දැක්විය හැකිය.

ඇතැම් යෙදුම් අනුසාරයෙන් බලන කල ඇතුන් පිළිබඳ රජයේ කාර්යාංශය හෙවත් කූරුව ද ඇත් පන්තිය යනුවෙන් හැඳින්වුණු සේයි. එකල රජුට වුවමනා හැම දෙයක් ම සැපයීම පිණිස ‘මඩු’ හෙවත් නිලධාරි මණ්ඩල තිබුණේය. රජුගේ ඇතුන් රැකබලා ගැනීම සඳහා වූ ඇත්පන්තිය භාර නිලධාරි මඩුල්ල ද ඒවා අතුරෙන් එකකි. ඇතුන් හීලෑ කිරීම, නෑවීම හා උන්ට කෑම සපයා දීම, ඇතුන් රෝගී වූ කල පිළියම් කිරීම, රජ දැක්මට හා රජුට වාහන පිණිස ඇතුන් සරසාගෙන ඊම, සටන් බිමට ගෙන යෑම, සටනට ඇතුන් පුහුණු කිරීම ආදි කාර්යයන් ඒ නිලධාරීන්ගේ සේවයට අයත් විය. සුළු සේවකයන්ගෙන් හා කම්කරුවන්ගෙන් වැඩ කරවාගැනීම ද වැඩෙහි යෙදවීම ද පහත් පෙළේ නිලධාරීන්ගේ රාජකාරිය වූයේය. මේ නිලධාරීන් හැමදෙනාට ම රාජකාරි නිලපංගු දී තිබුණේය. රජයෙන් දෙන ලද ඉඩම් පංගු බුත්ති විඳිමින් අවුරුද්දට නියමිත දින ගණනක් ඔවුන් රාජ සේවයෙහි යෙදිය යුතු විය.

(සංස්කරණය: 1967)