ඇන්ටිගෝනස් II
(ඇන්ටිගෝනස් ගෝනාටස්) (ක්රි.පූ. 319-239). මැසිඩෝනියානු රජ කෙනෙකි. ඇලෙක්සැන්ඩර්ගේ සෙන්පතියකු වූ ඇන්ටිගෝනස් I (බ.) ගේ මුනුබුරාය. ක්රි.පූ. 238 දී ඔහු තම පියාගේ මරණයෙන් පසුව රාජනාමය ලබාගත් නමුත් ක්රි.පූ. 276 දක්වා ඔහුට සිහසුන ලබා ගැනීමට නොහැකි විය. එසේ වූයේ ලිසි මැකස්, සෙලූකස් වැනි අයගේ විරුද්ධත්වය නිසාය. ගෝල්වරුන්ගේ ආක්රමණයන් නවතා ලූ ඇන්ටිගෝනස්ට ක්රි.පූ. 274 දක්වා මැසිඩෝනියාවේ තම බලය රැකගැනීමට හැකි විය. ක්රි.පූ. 263-255 යන කාලය අතරතුර ඇන්ටිගෝනස් නැවතත් රාජ්යයෙන් පලවා හරිනු ලැබීය. ඔහුගේ ඉතිරි රාජ්ය කාලය බොහෝ දුරට සාමකාමී පාලන සමයක් විය. ඔහුගේ අවංකකමත් කලාවන් කෙරෙහි දැක්වූ උනන්දුවත් නිසා ජනතාවගේ ප්රසාදය දිනා ගැනීමට ඔහුට හැකි විය. ඔහුගේ රජ වාසල කිවීන් හා දාර්ශනිකයන් සම්බන්ධයෙන් කීර්තියක් ඉසිලීය.
ඇන්ටිගෝනස් ගෝනාටස් ඉන්දියානු ඉතිහාසය හැදෑරීමේ දී ද වැදගත් වේ. අශෝක අධිරාජයාගේ XIII වන ගිරිලිපියේ සඳහන් වන "අන්ත කිනේ" නම් යවන රජතුමා ඇන්ටිගෝනස් ගෝනාටස් බව ඉතිහාසඥයන්ගේ මතයයි. අශෝක රජතුමා මේ යවන රජු සමඟ තානාපති සම්බන්ධකම් පැවත්වූ බව ශිලාලිපියේ සඳහන් වේ.
(සංස්කරණය: 1967)
