ඉරණතිව්

මන්නාරම් දූපතට සැතැපුම් 17ක් පමණ උතුරු දිගින් ද තුනුක්කායි ප්‍රදේශයේ වේරවිල්හි සිට සැ. 8ක් පමණ වයඹ දිගින් ද පිහිටි කුඩා දූපත් දෙකක් මෙනමින් හැඳින්වේ. උතුරු හා දකුණු ඉරණතිව් වශයෙන් වෙන් කොට හැඳින්වෙන මේ දූපත් දෙකින් උතුරු ඉරණතිව් දූපත ව.සැ. දෙකක් පමණ විශාල වේ. වර්ග සැතැපුමකටත් කුඩා වූ දකුණු දූපත සමහර විට සින්නතිව් නමින් ද හැඳින්වේ. පුනකාරි ආදායම්පාලක ප්‍රදේශයට අයත් ඉරණතිව්හි කොට්ඨාස හයකින් යුත් ගම්සභාවක් ඇත. උතුරු ඉරණතිව් දූපතෙහි උපතැපැල්හලක්, රජයේ බෙහෙත් ශාලාවක්, පාසලක් හා කුඩා පල්ලි දෙකක් ඇත. මෙහි උතුරු කෙළවර ප්‍රදීපාගාරයක් ද තිබේ. මෙම දූපත්වල පස නිසරුය. දේශගුණය ඉතා කර්කශය, වියළිය. එහෙයින් වෘක්ෂලතාදිය ද දුලබය. මසුන් මැරීම මෙහි ජනයාගේ ප්‍රධාන ජීවනෝපායයි. ඉරණතිව් දූපත් දෙකේ ජනගහනය තුන්හාරදහසක් පමණ වේ යයි සලකනු ලැබේ.

(සංස්කරණය: 1970)