උතුරුසළ
මෙය සත්විසි නැකැත් අතුරෙන් එක්විසිවැන්නය. උතුරුසළ නැකත කුල්ලක සටහනක් ඇති කරවන රක්ත වර්ණ තරු සතරකින් යුක්ත යයි රාත්රිලග්නනිරූපණයෙහි දැක්වේ. ඇත් දතක ආකාරය ඇති කරවන තරු අටකින් යුක්ත යයි දීපිකා ටීකාවෙහි සඳහන් වේ. මේ නැකත මනුෂ්ය ගණයි; මුගටි දෙන් යෝනියි; කොස් වෘක්ෂයි; කුක්කුට පක්ෂියි; වායෝ භූතයි; පුලහ ගෝත්රයි; වෛශ්ය වර්ණයි; ස්ත්රී ලිංගයි; අන්ත්ය නාඩියි; නාභි රජ්ජුයි; මන්ද ලෝචනයි; ඌර්ධ්ව මුඛයි. විශ්ව දේවතාධිපති වූ මේ නැකත මහේන්ද්ර මණ්ඩලයට අයිතිය. රාශි චක්රයේ දක්ෂිණ මාර්ගයක් වූ දහන වීථියෙන් කොටසක් ද මේ නැකතට සම්බන්ධ වේ. මෙය උදා වී ඝටිකා විස්සක් ගිය තැන ඝටිකා සතරක් විෂ සහිත බැවින් ගමනෙහි අශුභයි.
මේ නැකතින් උත්පාත දර්ශනයක් වී නම් දුර්භික්ෂ භය ඇති වේ. උතුරුසළ නැකතින් මල්වර වූ කාන්තාතොමෝ මනා පැවතුම් හා පතිව්රතා ඇත්තියක් වන්නීය. ඇතුන් අසුන් පිට නැගීම් හා ගායනා ශිල්ප ඉගනීමෙහි ද දේවපූජා, ශාන්තිකර්ම, ගෘහාරම්භ, අභිෂේක, අන්නප්රාශන, කෘෂිකර්ම, පුංසවන, සීමන්ත, නාමකරණ, උපනයන, විවාහ ආදියෙහි ද මේ නැකත ශුභයි. මේ නැකතින් උපන් තැනැත්තේ බොහෝ මිත්රයන් හා විශාල ශරීරයක් ද ඇති ධාර්මික ක්රියාවෙන් හා හික්මීමෙන් යුත් සැප සේ රැස් කළ ධනයෙන් යුත් යුද්ධයෙන් ජය ලබන්නෙක් වේ. බෙ, බො, ජ, ජි යන අකුරු සතර මේ නැකතේ පාද සතරට පිළිවෙළින් හිමිවේ.
(සංස්කරණය: 1970)
