උතුවන්කන්ද

උතුවන්කන්දේ සර්දියෙල් (බ.) නම් වූ සූර සොර දෙටුවා නිසා සුප්‍රකටව පවත්නා උතුවන්කන්ද නාමය මාවනැල්ල අසල පිහිටි කඳුකුළකට ද එය වටා පිහිටි ග්‍රාමයට ද ව්‍යවහාර වේ. උතුවන්කන්ද කඳුකුළ කොළඹ-මහනුවර පාරේ ඈතට දිස්වනුයේ පැරණි පර්වත බලකොටුවක ආකාරයෙනි. කොළඹ-මහනුවර පාරේ 55 වැනි සැතැපුම් කණුවට සැතැපුමක් පමණ උතුරු දිගින් නොහොත් මාවනැල්ල නගරයට සැතැපුම් දෙකක් පමණ වයඹ දිගින් පිහිටි උතුවන්කන්ද මුහුදු මට්ටමේ සිට අඩි 1410ක් පමණ උස් වූවකි. විශාල කළුගල් කුට්ටිවලින් සෑදුණු මෙහි ඉහළ කොටස ප්‍රපාතාකාරය; මුදුන වර්ග අඩි 50කට නොවැඩි තරම්ය.

උතුවන්කන්ද ග්‍රාමයෙහි කොළඹ-මහනුවර පාර අසබඩ පිහිටි කොටසෙහි කුඩා කඩමණ්ඩියකි. උතුවන්කන්දෙහි උපතැපැල් හලක් ද ඇත. රබර් හා පොල් ද, ගැමි වගාවන් අතුරෙහි වී, කෙසෙල්, ගම්මිරිස් හා කොකෝවා ද ප්‍රධාන වැවිලි වේ. මෙම ගම මාවනැල්ල සුළු නගර සභා ප්‍රදේශයෙහි අංක 1 දරන කොට්ඨාසයට ඇතුළත් වෙයි.

(සංස්කරණය: 1970)