ඌරුම්චි

(වුලුමුචී). මහජන චීනයේ සින්කියෑං ඌයිගූර් පළාතේ අගනුවරයි. කලකට පෙර දිහ්වා යන නාමය ද මීට ව්‍යවහාර විය. තියෙන්-ෂාන් කඳු පාමුල ඌරුම්චි ගංඟ ආශ්‍රිතව වූ ක්ෂේමභූමියක මෙම නගරය පිහිටියේය. මෙහි දේශගුණය වියළි මහාද්වීපික ගුණයෙන් යුක්තය. නගරය අවට වී ගොවිතැන ද ඛනිජතෙල්, රිදී හා තඹ හාරාගැන්ම ද දියුණුව තිබේ. විශේෂයෙන් නගරයේ උතුරු පෙදෙසෙහි ජල සම්පාදනය කරන ලද මුඩුබිම් අස්වැද්දීම සඳහා වූ සාමූහික ගොවිපළවල් ඇත. ලෝම වර්ග, සම්, බුමුතුරුණු හා සත්ව වෙළඳ මධ්‍යස්ථානයක් වශයෙන් මේ නගරය ප්‍රසිද්ධියක් උසුලයි. පුරාණයේ සිටම සයිබිරියාව ආදි ප්‍රදේශයන්ගෙන් පැමිණි තවලම් මංසන්ධියක් වූ මෙය දැනුදු මාර්ග සන්ධිස්ථානයක් වශයෙන් වැදගත් වේ. මෙහි ගුවන් තොටුපළක් ද තිබේ. ලැන්චව් සිට සෝවියට් රුසියාවේ ඇක්ටෝගායි දක්වා වූ දුම්රිය මාර්ගය ද ඌරුම්චි හරහා වැටී ඇත. ජනගහනය (1958) 320,000ක් පමණ විය.

(සංස්කරණය: 1974)