ඔගස්ටා
ඇමරිකාවේ ජෝර්ජියා ජනපදයට අයත් නගරයකි. මෙම ජනපදයේ නැගෙනහිර සීමාවේ වර්තමාන ප්රධාන නගරය වූ ඇට්ලැන්ටා නුවරට සැතැපුම් 171ක් අග්නිදිගින්, සැවනා ගංඉවුරේ මෙය පිහිටා තිබේ. ජනපදයේ දෙවැනි පැරණි නගරය වූ ඔගස්ටා ප්රධාන කපු වෙළඳ මධ්යස්ථානයක් ද වෙයි. 1786 සිට 1795 දක්වා මෙය ජෝර්ජියාවේ අගනුවර වූයේය.
යටත් විදේශ යුගයේ දී රතු ඉන්දියන්වරුන් සමඟ ඇති කරගත් ගිවිසුම් හා සාම සාකච්ඡා කීපයක් ම මෙහි දී සිදු විය. වෙළහෙළඳාම අතින් මෙහි උසස් දියුණුවක් ඇති වූයේ දුම් නැව් යාත්රාකිරීම පටන් ගැනීමෙන් පසුවය.
සාන්ත පාවුලු දේවස්ථානය, ඔගස්ටා ශස්ත්රාගාරය හා වුඩ්රෝ විල්සන් සිය ළමා කාලය ගත කළ දේවගැති නිවස මෙහි ඓතිහාසික ගොඩනැඟිලිවලින් කීපයකි. ජෝර්ජියා විශ්වවිද්යාලයේ වෛද්ය අංශය ද මානසික රෝගීන් සඳහා වූ පාසලක් ද නීග්රෝ පාසල් කීපයක් ද මෙහි ඇත. දළ රෙදි (press-cloth) කර්මාන්තශාලාවක් හා විශාල රෙදි මෝල් කීපයකුත් කර්මාන්තායතන අතර වේ.
ජනගහනය 1960 දී ඇතුළු නුවර පමණක් 70,626ක් ද ප්රත්යන්ත සීමා ද ඇතුළු පෙදෙසෙහි 216,639ක් ද විය.
(සංස්කරණය: 1974)
