ඔන්ජෝජි විහාරය
ජපානයේ සුප්‍රසිද්ධ පැරණි බෞද්ධ විහාරයකි. ෂිගා පළාත බද ඔත්සු නගරයෙහි පිහිටි බිවා නම් වූ වැව අසබඩ මෙය ගොඩනඟා ඇත. ජපානයේ සුප්‍රසිද්ධ බෞද්ධ නිකායක් වූ තෙන්දයි නිකායේ ම කොටසක් වන ජිමොන්-හා නිකායට අයත් මෙම විහාරය අනේපිඩු සිටාණන් විසින් කරවූ ජේතවන මහා විහාරයට සමානව නිම කළ බව කියනු ලැබේ. ඔන්ජෝජි යනුවෙන් ‘විහාරය සහිත මහා උද්‍යානය’ යන තේරුම ගෙන දේ. ඔන්ජෝජි විහාරය මි-ඉදෙර යන නමින් ද හැඳින්වේ.
කෝබුන් නමැති ජපන් අධිරාජයා සිහිවීම පිණිස ක්‍රි.ව.686 දී ඔතොමො නම් කුමරකු විසින් ඔන්ජෝජි විහාරය පළමුවෙන් ම ගොඩනංවන ලදි. පසු කාලයේ දී ක්‍රමයෙන් ජරාවාසයට පත් ඔන්ජෝජි විහාරය ක්‍රි.ව.858 දී එන්ර්යකුජි (බ.) මහා විහාරයේ විසූ එන්ෂින් (ජිෂෝ දයිෂි) නම් මහ තෙරුන් විසින් ප්‍රකෘතිමත් කරවන ලදි. එතැන් සිට ඔන්ජෝජි විහාරය තෙන්දයි නිකායේ මධ්‍යස්ථානය වූ එන්ර්යකුජි විහාරයේ ප්‍රධාන ශාඛාවක් බවට පත් විය. දැනට ඔන්ජෝජි විහාරය එන්ර්යකුජි විහාරයෙන් වෙන්ව පවතී.
ඔන්ජෝජි විහාරය පිහිටි භූමිභාගය වර්ග සැතැප්මක් පමණ වේ. විහාරයට අයත් දර්ශනීය ගොඩනැඟිලි අතර ආගන්තුක ශාලාව, ප්‍රධාන ශාලාව සහ තෙමහල් චෛත්‍යය ද ප්‍රධාන වේ. මේවා හෙයියන්, මොමොයමා ආදි යුගවල දී නිමවන ලදි. විහාරයට අයත් විවිධ ගොඩනැඟිලි මෙන් ම ඒවා තුළ ඇත්තා වූ පැළලි චිත්‍ර, මූර්ති නිර්මාණ ආදිය ද ජාතික වස්තු ලෙස ආරක්ෂා කරනු ලැබේ. අවට පිහිටි සෙසු විහාර 49ක් ද දේවමන්දිර 5ක් සහ සංඝාරාම 25ක් ද ඔන්ජෝජි විහාරයට අයත්ය.
(සංස්කරණය: 1974)
