ඔරාන්

(වාහ්රාන්). ඇල්ජීරියාවේ පරිපාලන කොට්ඨාසයක් ද එම කොට්ඨාසයේ නැව්තොටු අගනුවර ද මෙනමින් හැඳින්වේ. ව.කිමී. 16,438ක් විශාල පරිපාලන කොට්ඨාසයේ ජනගහනය (1963) 706,200කි.

ඇල්ජියර්ස් නුවරට සැතැපුම් 225ක් බටහිරින් මධ්‍යධරණී මුහුදේ ප්‍රධාන මුහුදු මාර්ගයේ පිහිටි වැදගත් නැව්තොටක් වූ ඔරාන් නගරය ඇල්ජියර්ස් නුවරින් පටන් ගන්නා ප්‍රධාන දුම්රිය මාර්ගය සමග ද සම්බන්ධ වී ඇත. ඔරාන් විශාල වෙළඳ මධ්‍යස්ථානයකි. අප්‍රිකාවේ අභ්‍යන්තර නගර හා යුරෝපයේ දකුණු දිග පිහිටි වරායවල් සමග මේ නගරවාසීහු විශාල වශයෙන් වෙළඳාම් කරති. වයින්, ධාන්‍ය වර්ග, එස්පාටෝ තණ යනාදිය මෙයින් පිට රට යවන බඩුය. මෙහි ජනගහනය (1960) 350,087කි.

ඔරාන් ඉස්ලාම් භක්තිකයන් විසින් ගොඩනගන ලද්දකි. 15 වන ශතවර්ෂයේ මැද භාගයේ දී එය ප්‍රසිද්ධ වෙළඳ නගරයක් විය. 1509 දී එය ස්පාඤ්ඤවරුන් විසින් ද 1708 දී තුර්කිවරුන් විසින් ද 1732 දී නැවතත් ස්පාඤ්ඤවරුන් විසින් ද අයිතිකර ගන්නා ලදි. 1791 දී සිදු වූ භූමිකම්පාවෙන් පසු ස්පාඤ්ඤවරු එය අත්හැර දැමූහ. 19 වන ශතවර්ෂයේ මුල භාගයේ දී ප්‍රංස ජනයා විසින් අත්පත් කරගනු ලැබූ මෙය ප්‍රංස නගරයක මුහුණුවර ඇති වැදගත් නුවරක් බවට පත් විය.

1942 දී ඇමෙරිකානු සේනා විසින් අල්ලා ගන්නා ලද මෙනුවර එතැන් සිට පාලන හා වෙළඳ මධ්‍යස්ථානයක් ද වරායක් ද වශයෙන් ශීඝ්‍රව දියුණු වන්නට විය. 1962 දී ඇල්ජීරියාව නිදහස ලැබීමට පෙරාතුවත් ඉන් පසුවත් මෙහි දරුණු යුරෝපීය මුස්ලිම් කලකෝලාහල පැවැත්තේය.

මෙකල පරිපාලන කොට්ඨාසයත් නුවරත් වාහ්රාන් නමින් හැඳින්වේ.

(සංස්කරණය: 1974)