මැවීම
(Creation)
ක්‍රිස්තියානි මතය
ලෝකය මැවීම සම්බන්ධ විස්තරයක් ශුද්ධ බයිබලයේ පරණ තෙස්තමේන්තුවේ පළමුවෙනි පොත වූ උත්පත්ති කථාවෙහි සඳහන් වේ. එය යුදෙව් ඉතිහාසයේ යුග දෙකකදී ලියන ලද කථාන්තර දෙකකින් යුක්ත ය. ඒ දෙක්හිම ප්‍රධාන අදහස නම් ලෝකය දෙවියන් වහන්සේ විසින් මවන බව ඉගැන්වීමයි.
ප්‍රථම විස්තරයෙහි සඳහන් වන්නේ ක්‍රිස්තු පූර්‍ව 1200ටත් ප්‍රථමයෙන් ඇති වූ කථා කීපයකි. දෙවියන් වහන්සේ ප්‍රථම මනුෂ්‍යයා හෙවත් ආදම් පොළොවේ දූවිල්ලෙන් මවා ඔහු තුළ ජීවමාන ආත්මයක් ඇති කළ අයුරු එහි විස්තර වේ. ඒ ප්‍රකාශයෙන් අදහස් කරනුයේ මනුෂ්‍ය ශරීරය පෘථිවි ධාතුවෙන් සෑදී තිබෙන බවත්, මනුෂ්‍යයා තුළ ජීවිතය පමණක් නොව ආත්මයකුත් තිබෙන බවත් ස්ත්‍රිය හෙවත් මනුෂ්‍ය වර්‍ගයාගේ මව යන අර්ථය ඇති 'ඒව', මැවූ පිළිවෙල විස්තර වන්නේ මීට වෙනස් ආකාරයකිනි. ආදම්ගේ ඉල ඇටයකින් ඒව මවනු ලැබූ බව කීමෙන් යුදෙව්වරුන් ස්වකීය අනුගාමිකයින් තුළ ඇති කරන්ට අදහස් කෙළේ, පුරුෂයකු විසින් තම කීමෙන් යුදෙව්වරුන් ස්වකීය කොටසක් ලෙස තමාගේ “ඇටවලින් ඇට, මාංසයෙන් මාංසය” වශයෙන් සැලකිය යුතු බවයි. මේ පළමුවෙනි කථාවෙහි විශේෂයෙන් අවධානය යොමුවනුයේ හුදෙක් මනුෂ්‍ය වර්‍ගයාගේ මැවීම කෙරෙහිය. සෙසු මැවීම් ගැන සවිස්තරව සඳහන්ව නැත.
ක්‍රිස්තු පූර්‍ව 600ට පසුව සිරකරුවන් ලෙස බැබිලෝනියාවට ගෙනයන ලද්දා වූ යුදෙව්වෝ බැබිලෝනියානුවන්ගේ විද්‍යාවන් හදාරා මැවීමේ දෙවෙනි කථාන්තරය මීට සම්බන්ධ කළෝ ය. මෙය ඊට සම්බන්ධ කළේ පළමුවෙන් පැවති විස්තරයෙහි මුලට ය. එහිදී ඔවුන් පසුව ඉගෙන ගත්තා වූ පරිණාමවාදය ඇතුළත් කොට ඇති බව අපට පෙනේ. මේ කථාන්තරයේ හැටියට මුළු ලෝකයම මවා තිබෙන්නේ දින කීපයක දී හෝ යුග කීපයක දී ය. පළමුව ආලෝකයත්, දෙවනුව ගොඩබිම හා ජලයත්, පසුව වෘක්ෂලතාදියත් මවා ඉක්බිති සූර්‍ය්‍යයා, චන්ද්‍රයා හා තාරකාත්, ඊට පසුව පක්ෂීනුත්, ජලජ සත්වයනුත්, ගොඩසතුනුත්, අවසානයෙහි මනුෂ්‍යයාත් මැවූ බව පෙනේ.
දෙවියන් වහන්සේ දින හයකදී ලොව මැවූ බවත්, හත්වෙනි දින විශ්‍රාම දිනයක් වූ බවත් යුදෙව්වෝ ඉගැන්වූහ. එයින් යුදෙව්වන් අදහස් කළේ විවේක ගැනීමේ දිනයක ඇති වැදගත්කම මනුෂ්‍යයන්ට ඉගැන්වීමය.
අද ක්‍රිස්තියානිකාරයෝ මේ මැවීමේ කථාන්තර ආගමික මූලික සත්‍යයන් පිළිබඳ ඉගැන්වීම් ලෙස පිළිගනිති. පළමුව දෙවියන් වහන්සේ විසින් ලොව මවනු ලැබූ බවත් දෙවනුව ආත්මයක් ඇති මනුෂ්‍යා අනික් ප්‍රාණීන්ට වඩා උසස් බවත් ඉන් ප්‍රකාශ වේ. මින් බැහැර අනික් කොටස් එකල පැවති දැනීම අනුව මේ විශ්වාසයන් පැහැදිලි කිරීම සඳහා ලියූ දේ විනා ආගමික දේ නොවේ.
(කර්තෘ: අඥාතයි)
(සංස්කරණය නොකළ)
