අරලුප්පිටි සඳහා මුලාශ්‍රය නරඹන්න

අරලුප්පිටි නමින් දන්නා ද්‍රව්‍යය පහසුවෙන් දිරවිය හැකි හෙයින් ළදරුවන්ට ද ගිලනුන්ට ද දීමට ගනු ලබන පිටි වර්ගයකි. නොයෙක් පැළෑටිවල මුල්වලින් සහ රයිසෝමවලින් එය සාදනු ලැබේ. එහෙත් නියම අරලුප්පිටි සාදනුයේ [[හුළංකීරිය]] (බ.) රයිසෝමවලිනි. අවුරුද්දක් පමණ වයසැති හුළංකීරිය රයිසෝම සෝදා, පොතුහැර කොටා, කෙඳි ආදිය ඉවත් කිරීම පිණිස කිහිප විටක් සෝදා දිය පෙරා හැරීමෙන් පිටි වෙන්කරගනු ලැබේ. මෙසේ ලැබෙන පිටි වේලාගත් විට ඊට අරලුප්පිටි යයි කියනු ලැබේ. විශාල වශයෙන් මෙම පිටි නිෂ්පාදනය කිරීමේ දී ඒ සඳහා විශේෂ යන්ත්‍ර සූත්‍ර භාවිත කරති.
විශේෂයෙන් බටහිර සහ නැගෙනහිර ඉන්දියානු කොදෙව් අරලුප්පිටි ගැන ප්‍රසිද්ධය.

ම‍‍‍‍‍ඤේඤාක්කා, බුත්සරණ ආදි තවත් සමහර පැළෑටිවලින් ද අරලුප්පිටි සාදකි. අරලුප්පිටිවල 82%ක් පමණ පිෂ්ටය ද 1%ක් පමණ ප්‍රෝටීන් සහ ඛනිජ ද්‍රව්‍ය ද ඇත.

අරලුප්පිටි ආහාර වශයෙන් හා බෙහෙත් යෝග සඳහා ද ගනු ලැබේ. මල භේදය අධිකව පවත්නා කල නූතන ආයුර්වේද වෛද්‍යවරයෝ අරලුප්පිටි කැඳ පිස දීමට නියම කරති. ළදරුවන්ගේ මල ඉතා ද්‍රවාකාරයෙන් නිකුත් වන කල ද අරලුප්පිටි කැඳ ගුණදායී ඖෂධයක් වේ.