ඇඤ්ජවින් පෙළපත සඳහා මුලාශ්‍රය නරඹන්න

ක්‍රි.ව. 1154 සිට 1485 දක්වා කාලය තුළ එංගලන්තයේ සිහසුන දැරූ රජවරුන් අයත් රජ පෙළපතය. ප්ලැන්ටැජනට් නමින් ද අඤ්ජු රාජ පෙළපත නමින් ද හැඳින්වෙන්නේ මෙම රජපරපුර මය. ඇඤ්ජවින් හෙවත් අඤ්ජු යන නම ඊට ලැබුණේ ප්‍රංසයේ අඤ්ජු ප්‍රදේශයේ ආදිපාදවරයකුගේ පුත්‍රයකුගෙන් එම පරපුර ඇරඹුණු හෙයිනි.

1110 දී 5 වැනි ෆල්ක් ප්‍රංසයේ අඤ්ජුහි ආදිපාද බවට පත් වීමෙන් පසු එරට නෝර්මන්ඩි ප්‍රදේශයේ ආදිපාද ධුරය ද ඉසුලූ එංගලන්තයේ හෙන්රි I රජු හා ඔහු අතර භේද ඇති විය. කලක් පැවති සටන්වලින් පසු දෙදෙනා අතර ඇති වූ සාමය හෙන්රිගේ දුවක ෆල්ක්ගේ පුත්‍ර ජෙෆ්රිට විවා කරදීමෙන් තහවුරු කැරිණ. එංගලන්තයේ හෙන්රි II නමින් රජ වූයේ මේ ජෙෆ්රිගේ පුත්‍ර හෙන්රිය.

ප්ලැන්ටැජනට් හෙවත් ඇඤ්ජවින් පෙළපතට අයත් රජවරු 14 දෙනෙක් වූහ. නියම ඇඤ්ජවින් පරපුරට අයත් සේ සලකනු ලබන්නේ 1399 දී මිය ගිය රිචඩ් II දක්වා වූ රජවරුන් 8 දෙනාය. 1399 සිට 1485 දක්වා වූ රජවරු ප්ලැන්ටැජනට් පෙළපතින් බෙදුණු ලැංකැස්ට්‍රියන් හා යෝක් යන දෙපරපුරට අයත්හයි සලකනු ලැබේ. පහත දැක්වෙන්නේ සාමාන්‍යයෙන් ඇඤ්ජවින් පෙළපතට අයත් සේ ගැනෙන රජවරුන් 14 දෙනාගේ නම්ය: හෙන්රි II, රිචඩ් I, ජෝන්, හෙන්රි III, එඩ්වඩ් I, එඩ්වඩ් II, එඩ්වඩ් III, රිචඩ් II, හෙන්රි IV, හෙන්රි V, හෙන්රි VI, එඩ්වඩ් IV, එඩ්වඩ් V හා රිචඩ් III.

(සංස්කරණය: 1967)

[[ප්‍රවර්ගය: යුරෝපා ඉතිහාසය]] 

[[ප්‍රවර්ගය: ඇ]]