දෙවරගම්පොළ සිල්වත් තැන සඳහා මුලාශ්‍රය නරඹන්න

අටලොස් වන සියවසේ අග භාගයේත් එකුත් විසි වන සියවසේ මුල් භාගයේත් මහනුවර රජතුමා වූ කීර්ති ශ්‍රී රාජසිංහ කාලයේ විශේෂ කීර්තියකින් යුක්තව සිටි දක්ෂ කලා ශිල්පියෙකි. සතර කෝරළයේ මවනැල්ල අසල දෙවරගම්පොළ නම් ගමේ උපත ලැබූවෙකි. සියම් නිකායික හෙරණ නමක් ව සිටියේ ය. ගොවි කුලයෙන් බාහිර කුලවලින් මහණ වූවන් උපසම්පදා නොකිරීම එකල සියම් නිකායික සම්ප්‍රදායක් වූ හෙයින් උපසපන් නොලැබූහ. එබඳු හෙරණුන් එකල හැඳින් වූයේ 'සිල්වත්තැන' කියායි. දෙවරගම්පොළ සිල්වත් තැන කීර්ති ශ්‍රී රාජසිංහ රජුට කලින් රජ කළ ශ්‍රී විජය රාජසිංහ රජුගේ හා නරේන්ද්‍රසිංහ රජුගේ ද ඇසුර ලැබූ කෙනෙකි. චිත්‍රකරණයෙහි ද ප්‍රතිමා නිර්මාණයෙහි ද කැටයමෙහි ද එක සේ දක්ෂ මෙතුමෝ සුප්‍රසිද්ධ පැරණි විහාර රාශියක චිත්‍ර ඇඳ තිබේ. දෙගල්දොරුව, දඹුලු විහාරය, රිදී විහාරය, මහනුවර විහාරය, දළදා මාලිගය, තොටගමු විහාරය හා ගනේතැන්නේ විහාරය ඉන් කීපයකි.

ස්ව ප්‍රතිභා ශක්තිය මෙහෙයවා නිවහල් කලා සම්ප්‍රදායයක් අනුගමනය කොට ස්වදේශීය වූ ම සායම් වර්ග යොදා නිමවා ඇති ඔහුගේ චිත්‍ර රාශියක් ම දැනුදු විද්‍යමාන වෙයි. දෙගල්දොරු විහාරයේ ඇඳ තිබෙන 'වෙස්සන්තර ජාතකය', ආනන්ද කුමාරස්වාමි වැනි දක්ෂ කලා පර්යේෂකයින්ගේ සිත් ගත් රමණීය නිර්මාණයකි.   

(කර්තෘ: [[හපුගොඩ සුමනතිස්ස ස්ථවිර]])

(සංස්කරණය නොකළ)

[[ප්‍රවර්ගය: චිත්‍ර ශිල්පියෝ-ලංකාවේ]] 

[[ප්‍රවර්ගය: ද]]