බ'නාඩ් හ'බට් අලුවිහාරේ සඳහා මුලාශ්‍රය නරඹන්න

(1902-1961). අකුණු මාතලේ ටී.බී. අලුවිහාරේ රටේ මහත්මයාගේ සහ පාණබොක්කේ ටිකිරි කුමාරිහාමිනේගේත් කනිටු පුත් බ’නාඩ් හ’බට් අලුවිහාරේ 1902 අප්‍රේල් මස 6 වැනි දින උපන්නේය. මහනුවර ත්‍රිත්ව විද්‍යාලයෙහි සහ ගල්කිස්සේ සාන්ත තෝමස් විද්‍යාලයෙහි අධ්‍යාපනය ලත් මොහු 1922 දී නීතිඥ විභාගයෙන් සමර්ථව උසස් අධ්‍යාපනය උදෙසා එංගලන්තයට ගොස් ඔක්ස්ෆඩ් විශ්වවිද්‍යාලයෙන් උපාධි ලබා 1929 දී බැරිස්ටර්වරයෙක් විය. 

ඉක්බිති ඉන්දියාවට ගිය අලුවිහාරේ මහතා මහත්මා ගාන්ධි ආදි ඉන්දිාවේ ජාතික වීරයන් ඇසුරු කෙරෙමින් ඒරට ජාතික විමුක්ති සටනට සහභාගී විය. 1931 දී කරච්චියෙහි පැවැත් වූ ජාතික සංගමයේ මහා සම්මේලනයට අලහබාද් දිස්ත්‍රික්කයේ නියෝජිතයා වශයෙන් මොහු තෝරා යවන ලදි. භාරත දේශයේ නිදහස සම්බන්ධයෙන් 1931 දී එංගලන්තයෙහි පැවැත්වුණු වටමේස සාකච්ඡාවට ද සහභාගි විය. 1932 දී ඉන්දියාවේ පැවැති සහයෝගතා වර්ජන ව්‍යාපාරයට බැඳී කටයුතු කිරීම කරණකොට ගෙන ඔහුට තෙමසක් බන්ධනාගාර ගතවී සිටින්නට ද සිදු විය. 

මෙසේ භාරත වීරයන් හා උරෙන් උර ගැටෙමින් මහත් උද්‍යෝගයෙන් භාරතයේ විමුක්ති සටනෙහි කලක් යෙදී සිටි අලුවිහාරේ මහතා කේම්බ්‍රිජ් විශ්වවිද්‍යාලයෙන් උපාධිලත් වෛද්‍යවරියක් වන ෆ්ලොරන්ස් කෞෂල්‍යා රාම් නමැති ඉන්දියානු කාන්තාව හා විවාහ වී ලංකාවට පෙරලා පැමිණ 1933 සිට අධිනීතිඥයකු වශයෙන් නීතිඥ වෘත්තියෙහි යෙදෙන්නට විය. 1932-34 අතරතුර අතින් නූල් කැටීමේ ව්‍යාපාරයක් ද ගෙන ගියේය. ලංකාව මුළුල්ලෙහි පැතිර ගිය මැලේරියා වසංගතයෙන් පීඩිත වූ අසරණ ජනයා උදෙසා මාතලේ මධ්‍යස්ථාන ගණනක ආරෝග්‍ය ශාලා අරඹා සිය මැතිනියිගේ ද සහාය ඇතිව මහත් සේවයක් ඉටු කෙළේය. 1936 දී පැවැත්වුණු රාජ්‍ය මන්ත්‍රණ සභා ඡන්ද විමසීමේ දී මාතලේ කොට්ඨාසයේ මන්ත්‍රී වරයා වශයෙන් තෝරා පත්කර ගන්නා ලදි. 

රාජ්‍ය මන්ත්‍රණ සභා යුගයේ දී ඩී.ඇස්. සේනානායක මහතා රටින් පිට ගොස් සිටි අවස්ථා තුනක දී ඒ මහතා වෙනුවට අලුවිහාරේ මහතා කෘෂිකර්‍ම අමාත්‍ය පදවියෙහි වැඩ බැලීය. 

ලංකාවට නිදහස ලැබීමෙන් පසු 1947 දී පවත්වන ලද පාර්ලිමේන්තු මැතිවරණයේ දී මාතලේ ආසනය අලුවිහාරේ මහතාට හිමි නොවුව ද 1952 දී පැවැත්වුණු ඡන්ද විමසීමේ දී ඒ ආසනය දිනාගන්නා ලදි. 
කලක් ම එක්සත් ජාතික පක්ෂයෙහි ප්‍රබල සාමාජිකයකුව සිටි ඔහු සිංහල මහාසභාව නම් දේශපාලන පක්ෂය ප්‍රතිසංවිධානය කිරීමෙන් අරඹන ලද ශ්‍රී ලංකා නිදහස් පක්ෂයේ ප්‍රමුඛ නිලධාරියකු වශයෙන් ක්‍රියා කළ නමුත් කල්යෑමේ දී නැවතත් එක්සත් ජාතික පක්ෂයට බැඳුණේය. 1956 ඡන්ද විමසීමේ දී මාතලේ ආසනය ඔහුට අහිමි විය. 1960 දී පැවැත්වුණු ඡන්ද විමසීම් දේකේ දී ම මාතලේ ආසනය යළිත් ඒ මහතා දිනා ගත්තේය. 1960 මාර්තු මැතිවරණයෙන් පසු පිහිටුවන ලද අල්පායුක්ෂ එක්සත් ජාතික පක්ෂ ආණ්ඩුවේ අධ්‍යාපන හා සංස්කෘතික අමාත්‍ය පදවිය ද කම්කරු කර්මාන්ත සහ ධීවර අමාත්‍ය පදවිය ද දැරුයේ අලුවිහාරේ මහතාය. 

1961 දී රෝගාතුරව එංගලන්තයේ සාත්තු නිවාසයක ප්‍රතිකාර ලබමින් සිටිය දී මියගිය ඒ් මහතාගේ භෂ්මාවශේෂ ලංකාවට ගෙනෙනු ලැබ පවුලේ සොහොන් ගැබෙහි තැන්පත් කරන ලදි. ‍  
         
(සංස්කරණය: 1965)

[[ප්‍රවර්ගය: පුද්ගල චරිත - ලංකා දේශපාලනය]] 

[[ප්‍රවර්ගය: අ]]