"අමරකෝෂ සන්නය" හි සංශෝධන අතර වෙනස්කම්

10:03, 5 ජූලි 2023 වන විට නවතම සංශෝධනය

වික්‍රමාදිත්‍යරාජසභායෙහි වැජැඹුණු අමරසිංහාචාර්‍ය්‍යයන් විසින් කරන ලද නාමලිංගානුශාසන නම් වූ අමරකෝෂයට (බ.) ලක්දිව විසූ විද්වත් ආචාර්‍ය්‍යවරයකු විසින් කරන ලද සිංහල ව්‍යාඛ්‍යානයෙකි. අමරකෝෂය හදාරන ලාංකේය ආධුනිකයන්ගේ අර්ථසිද්ධිය සලකා මෙම සන්නය සම්පාදනය කරන ලද බව හැ‍‍‍‍‍ඟේ. කවර කලක කිනම් ආචාර්‍ය්‍යවරයකු විසින් මෙය ලියන ලද දැයි කිසි තැනෙක පවසා නැත. තොටගමුවේ ශ්‍රී රාහුල සංඝරාජයන්වහන්සේ පඤ්චිකාප්‍රදීපයෙහි දී "කාරණ්ඩව" ශබ්දයට අර්ථ දක්වන තැනයී. "අමරසිංහ සන්‍යයෙහි දියැකිරළු යැ යි කීහු"යී (1896 මුද්‍රණය, 116 පිට) මේ ග්‍රන්ථය ද ප්‍රමාණ කොට සැලැකූ බව පෙනේ. ග්‍රන්ථයෙහි භාෂා ස්වරූපය දෙස බලන කල මෙය පොළොන්නරු සමයේ අවසාන කාලපරිච්ඡේදයෙහි දී නැතහොත් දඹදෙණි සමයෙහි දී කරන ලදැයි සිතිය හැකියි.

(සංස්කරණය:1963)