"තප්ති" හි සංශෝධන අතර වෙනස්කම්

11:25, 11 ඔක්තෝබර් 2023 වන විට නවතම සංශෝධනය

(Tapti). මධ්‍ය ඉන්දියාවේ පිහිටි ගංගාවකි. මධ්‍ය ප‍්‍රදේශ් ප‍්‍රාන්තයේ බෙතූල් නගරාසන්නයේ පිහිටි සත්පූර්ණ කඳු පන්තියට නැගෙනහිරින් ආරම්භ වී, ගෝධාවරී සහ නර්මදා නදීද්වයට මැදි ව බටහිර දෙසට ගලා ගොස් ගුජරාටයේ සූරත් නගරාසන්නයේ දී අරාබි මුහුදේ ඛම්බාත් (Khambhat/Cambay) බොක්කෙන් මුහුදට වැටේ. මහාරාශ්ට‍්‍ර ප‍්‍රාන්තයේ කන්දේශ් සහ විධර්භා ප‍්‍රදේශ ද මෙකී ගංගා ද්‍රෝණියට අයත් වේ. කිමී. 724ක දිගින් යුත් මෙහි කිමී. 300ක් පමණ දුරට යාත‍්‍රා ධාවනය කළ හැකි ය. මෙහි ජල තටකය ව.කිමී. 77,800කි. මුහුදට ඇදී යන සාමාන්‍ය ජල ධාරිතාව තත්පරයට ඝන මී. 489ක් වේ. සූර්ය දෙවියන්ගේ සහ ඡායා දේවතාවියගේ දියනි තපාති දෙවඟනගෙන් මෙහි නාමය සම්භව වුහයි විශ්වාසයයි. කෘෂිකාර්මික වාරි ජල සම්පාදනය ජල විදුලිය උත්පාදනය සහ ජලගැලීම් පාලනය අරමුණු කොට 1972 දී උකායි වේල්ල බැඳ ගුජරාට ප‍්‍රාන්තයේ දෙවන විශාලතම ජලාශය ඉදිකොට තිබෙනුයේ මෙම නදිය හරස් කිරීමෙනි.

කර්තෘ: රන්ජන දේවමිත‍්‍ර සේනාසිංහ

(සංස්කරනය නොකරන ලද-2022)