"චාර්ල්ස් රොබට් ඩාවින්" හි සංශෝධන අතර වෙනස්කම්

13:53, 9 පෙබරවාරි 2024 වන විට නවතම සංශෝධනය

(Charles Robert Darwin). (1809-1882). වර්ෂ 1809 දී එංගලන්තයේ ෂ්රූෂ්බරිවල ඉපදී, ඩාවින්හිදී 1882 දී මිය ගියේ ය. සුප්‍රසිද්ධ ඉරැස්මස් ඩාවින්ගේ මුණුබුරා ය. වයස අවුරුදු අටේ සිට ඩාවින් හදාවඩා ගත්තේ ඔහුගේ වැඩිමහල් සහෝදරිය විසිනි. සීයාගේ ආභාසය නිසා ඩාවින් කුඩා කාලයේ සිට ම ස්වභාව අධ්‍යයනයට කැමැත්තක් දැක්වූය. එහෙත් කැපී පෙනෙන බුද්ධියක් නොපෙන්වී ය. ඇත්තෙන් ම පසුව පරිණාමවාදය වැනි විප්ලවීය අදහසක් ඔහු විසින් ඉදිරිපත් කරාවි යැයි කිසිවකු විසින් විශ්වාස නොකරන ලදි. ඩාවින් පළමුවෙන්ම වෛද්‍ය විද්‍යාව හැදෑරී ය. මෙයත් සීයාගේ බලපෑම නිසා විය හැක. පසුව පූජකවරයෙක් වීමේ අදහසින් ඔහු ක්‍රිස්තියානි ධර්මය හැදෑරී ය. වර්ෂ 1831 වන තුරු නියම මාර්ගයක් ගැනීමට ඩාවින් අසමත් විය.

කේම්බ්‍රිජ් විශ්වවිද්‍යාලයෙන් උපාධියක් ලබා ගත් ඩාවින් වර්ෂ 1831 දී සිය විප්ලවීය සංචාරය ආරම්භ කළේ ය. ලොව වටා දේශ ගවේෂණය කිරීම සඳහා ‘බීගල්’ නම් යාත්‍රාව ගමන් ආරම්භ කළා ය. මෙම දේශ ගවේෂණයේ ස්වභාව අධ්‍යයන නායකයා ලෙස ඩාවින් පත් කරනු ලැබීය. අවුරුදු 5ක් තුළ කළ මෙම සංචාරයේ දී ඩාවින්ට ස්වාභාවික පැළෑටි සහ සතුන් විශාල සංඛ්‍යාවක් හැදෑරීමට අවස්ථාවක් ලැබිණ. මෙලෙස එකතු කරන ලද ශාක සහ සත්ත්ව ද්‍රව්‍ය ඊළඟ අවුරුදු 20 තුළ ඩාවින් යුහුසුලු ව තැබීමට සමත් විය.

මෙම දේශ ගවේෂණය ආරම්භ කරන තුරු ඩාවින් විසින් පරිණාමය පිළිබඳව නිසි මතයක් නොදරන ලදි. දැනට ජීවත් වන ජීවින් සරල, ආදිකාලීන ජීවියෙකුගෙන් පරිණාමය වූවේ යැයි ඔහු විශ්වාස නොකළේ ය. ඒ කාලයේ ජීවත් වූ අන්‍ය පුද්ගලයින් විශ්වාස කළ අන්දමට ඩාවින් විශ්වාස කළේ ද, ඒ ඒ ජීවියා දැනට විද්‍යමාන වන ස්වාභාවයෙන්ම යම් බලවේගයක් විසින් මවන ලද බව ය. දකුණු ඇමෙරිකාවේ දී හමු වූ පුරාතන සත්ත්ව ඇට සැකිලි, ඇට කැබලි වත්මන් සතුන් හා එක්තරා දුරකට සමාන වුව ද නියම ලෙස එක හා සමාන නොවී ය. ගලපගෝස් වැනි තනි වූ දූපතක් තුළ විසූ කුරුල්ලෝ අසල මහද්වීපයේ කුරුල්ලන් හා සමාන වුව ද යම් පැහැදිළිව පෙනෙන වෙනස්කම් උන් තුළ විද්‍යමාන විය. මෙම නිරීක්ෂණයේ පරිණාමය පිළිබඳ පැහැදිළි උදාහරණ ලැබිණ. මෙය සිදු වන්නේ කෙසේද?

වර්ෂ 1836 දී ඩාවින් ආපසු එංගලන්තයට පැමිණි පසු මෙම ප්‍රශ්නය ගැන ගැඹුරින් සලකා බැලීමට පටන් ගත්තේ ය. වර්ෂ 20ක අධ්‍යාපනයෙන් පසු ඩාවින් 1856 දී තම පරිණාමවාදය ලියන්නට පටන් ගත්තේ ය. වර්ෂ 1858 දී ඇල්ෆ්‍රඩ් රසල් වොලස් නම් තරුණ ස්වාභාවික ද්‍රව්‍ය පිළිබඳ විද්‍යාඥයෙකු ද ඩාවින්ගේ මතය තහවුරු කරමින් ඩාවින් වෙත එවන ලද ලිපියක්, පරිණාමවාද ග්‍රන්ථයක් වශයෙන් එළිදැක්වීමට ඩාවින් ව වඩාත් උනන්දු කළේ ය.

මෙම ග්‍රන්ථය වර්ෂ 1859 දී ‘ස්වාභාවික තේරීම මඟින් සිදුවන ජාතිසම්භවය’ නමින් පළ කරන ලදි.

මෙම ග්‍රන්ථය පළ කිරීමත් සමඟ ම විශාල විරෝධයක් මහජනයාගෙන් පළවූයේ ය. ක්‍රිස්තු ධර්මය අනුව එක එක විශේෂය වෙන වෙන ම මවන බවට ඉගැන්වීම කෙරේ. එදා තදින් ම විශ්වාස කළ මෙම මතය බිඳීම ලෙහෙසි පහසු නොවී ය. වඩාත් ම විරෝධය පළ කළේ පල්ලිය විසිනි. ඩාවින් වඳුරකු ලෙස ඇඳි විකට චිත්‍ර බොහෝ පුවත්පත්වල පළ විය.

ජීවීන්ගේ සම්භවය පිළිබඳව පළ වූ මෙම පළමු ග්‍රන්ථය කෙසේ හෝ විද්‍යාඥයන්ගේ පිළිගැනීමට ලක් විය. මෙම ග්‍රන්ථය පළ කිරීමෙන් පසු තවත් ග්‍රන්ථ දෙකක් ඩාවින් විසින් පළ කරන ලදි. ‘හීලෑකිරීම නිසා සතුන් සහ ශාක තුළ සිදු වන වෙනස්කම්’ (1868) සහ ‘මිනිසාගේ අවගමනය සහ ලිංගය අනුව තේරීම’ (1871) ඒ ග්‍රන්ථ දෙක විය.

චාල්ස් ඩාවින්ගේ අවසාන කාලය අයහපත් සෞඛ්‍ය තත්වයෙන් ගත කරන ලදි දකුණු ඇමෙරිකාවේ දී වැළදුණු එම අවධියේ හඳුනාගෙන නොමැති රෝගයක් සුව කිරීමට නොහැකි ව මේ මහා දාර්ශනිකයා 1882 අප්‍රේල් 22 දින එංගලන්තයේ ඩාවින්හි දී අභාවප්‍රාප්ත විය.

(කර්තෘ: උපාලි එම්. සේනානායක: 2019)

(සංස්කරණය: කුලතිලක කුමාරසිංහ: 2019)