"දැති මෝරා" හි සංශෝධන අතර වෙනස්කම්

16:12, 14 මාර්තු 2024 වන විට නවතම සංශෝධනය

ඉතා දිග තුණ්ඩයක් බවට පත් වූ හොම්බක් සහිත මත්ස්‍යයන් විශේෂයකි. මෙම තුණ්ඩය දෙපස නියනක දැති ආකාරය පිහිටි දත් පේලි 2ක් ඇත. මෙම දත් විකිරණය වූ චර්මීය කොරල ය. දේහයේ සැකිල්ල සමන්විත වනුයේ අස්ථිවලින් නොව කාටිලේජවලිනි. ඒ නිසා කාටිලේජ මත්ස්‍යයන් අයත් වන Chondrichthyes වර්ගයට ඇතුළත් කෙරේ. දේහය මෝරෙකුගේ මෙන් වුවත් ජලක්ලෝම විවර පිහිටා ඇත්තේ මඩුවන්ගේ මෙන් දේහයේ උදරීය පැත්තේ ය. එනිසා මොවුන් මඩුවන් අයත් වන Raji formes ගෝත්‍රය යටතේ වර්ගීකරණය කරනු ලැබේ. ජලක්ලෝම විවර 5කි. මොවුන්ට විසමාංශපුච්ජ පෞඩජ වරලක්, පෘෂ්ඨීය වරල් 2ක්, ගුද වරලක්, ලය වරල් යුගලක් සහ ශ්‍රෝණි වරල් යුගලක් ඇත. ලය වරල් අනිත් වරල්වලට සාපේක්‍ෂව විශාල ය. ලය වරල් සහ ශ්‍රෝණි වරල් දේහයේ උදරීයව පිහිටයි. ඇස්වලට පිටු පසින් දේහයේ පෘෂ්ඨියට ශ්වාසරන්ද්‍ර යුගලක් ද පිහිටයි. මුඛය පිහිටනුයේ උදරීයව ය. ඇස් පිහිටනුයේ දේහයේ පෘෂ්ඨිය දෙසට වන්නට ය.

මෙහි දැති මෝරුන් මීටර 9ක් පමණ දිගට වර්ධනය වෙති. ඔවුන්ගේ දැති වැනි දත් සහිත තුණ්ඩය මීටර් 3ක් පමණ දිගු වේ.

දැති මෝරුන් අණ්ඩජලාබුජ ය. ශ්‍රී ලංකාව ආශ්‍රිත මුහුදේ දැති මෝරුන් විශේෂ 3ක් හඳුනා ගෙන ඇත. එනම්,

Pristis microdon

Pristis cuspidatus

Pristis zijsron ය.

Pristis microdon මීටර 5ක් පමණ දිගට වර්ධනය වේ. ඔවුහු මිරිදියට ද කලාතුරකින් පර්යටනය කරති. පෘෂ්ඨීය පැත්ත අළු දුඹුරු පැහැයක් ගන්නා අතර උදරීය පැත්ත සුදු පැහැති ය. Pristis zijsron මීටර් 8ක් පමණ දිගට වර්ධනය වේ. වර්ගීකරණයේ දී සත්ත්ව විද්‍යාඥයින් විසින් මොවුන් ඇතුළත් කරන්නේ Pristidae කුළයට ය.

ආශ්‍රිත ග්‍රන්ථ

Munro, I. S. R. , 1955. The Marine and Freshwater Fidres of ceylon, Department of External Affairs, canberra, 351, pp

Marcon, E. , and Mongini, M. , 1980. World Encyclopedia of Animals. Macdonald and Co. Ltd., London.

රූප සටහන්

Marcon and Monginiහි 107 පිටුව හෝ Munroහි 28 රූපය

(කර්තෘ: එම්.ජේ.එස්. විජේරත්න)

(සංස්කරණය නොකළ)