"අරිෂ්ටශතකය" හි සංශෝධන අතර වෙනස්කම්

12:42, 31 ජනවාරි 2025 වන විට නවතම සංශෝධනය

මාධව නිදානය ආදි උසස් ග්‍රන්ථ සුලභ වන්නට පෙර දේශීය වෛද්‍යවරයන්ට රෝග විනිශ්චය පුහුණු කරලීම් වස් අරිෂ්ටශතකය නම් වෛද්‍යක ග්‍රන්ථය අතිශයින් ප්‍රයෝජනවත් විය. එකල ආයුර්වේදය ගැන ශාස්ත්‍රීය දැනුම අඩු ගම්බද වෛද්‍යවරයෝ ගෝලයන්ට අරිෂ්ටශතකය සන්නයත් සමඟ කටපාඩම් කර වූහ. අරිෂ්ට නම් වනුයේ රෝගයක අසාධ්‍ය ලක්ෂණය. මේ කුඩා පොත නමින් අරිෂ්ටශතකය වුවත් අරිෂ්ට ලක්ෂණ දැක්වෙන්නේ පද්‍ය දෙකකින් පමණකි. මාධවනිදානයෙහි දෙවන පද්‍යය වූ "නානාමුනීනාං" ආදි ශ්ලෝකයෙන් මේ ග්‍රන්ථය ආරම්භ වේ. ජීවර, අජීර්ණ, අශීතිවායු ආදී රෝගයගේ ලක්ෂණ ද වාපිත්සෙම් කිපීමට හේතු, පිත්තස්වභාව, තුන් දොස් කිපෙන කාල, සප්තධාතුගත රෝග, පඤ්චකර්මවිධි හා කලාව පිහිටන ක්‍රමය ආදිය පිළිබඳ කරුණු ද මෙහි සැකෙවින් හඳුන්වා දී තිබේ. මෙය සාරාර්ථ සංග්‍රහය, මාධවය, අෂ්ටාංගහෘදය ආදි ග්‍රන්ථවලින් ස්වල්ප වශයෙන් කරුණු උපුටා ගෙන සැකෙවින් කළ සංග්‍රහයක් ලෙස සැලකිය හැක.

අරිෂ්ටශතකය කවියට නැඟීමෙන් කරනලද අරිෂ්ටමාලාව නම් සිංහල ග්‍රන්ථයක් ද වේ. සත් කෝරළේ විසූ මිදෙල්ලව කෝරාළ එහි කර්තෘය.

(සංස්කරණය: 1965)