"ඇට්ලැන්ටා" හි සංශෝධන අතර වෙනස්කම්

09:54, 9 මැයි 2025 වන විට නවතම සංශෝධනය

ඇමෙරිකා එක්සත් ජනපද රාජ්‍යයේ ජෝජියා ජනපදයේ අගනුවරය. සවැනා මුහුදු තොටට සැතැපුම් 230ක් පමණ වයඹ දිගින්, බ්ලූ රිජ් කඳුවැටියේ නෙරුවක පිහිටා තිබේ. මෙය එම ජනපදයේ විශාලතම වාණිජ, කාර්මික සහ ආධ්‍යාපනික මධ්‍යස්ථානයයි.

දුම්රිය ගමනාගමනය දියුණු වීම සමඟ ම සංවර්ධනය වූ මේ නගරය දැන් දුම්රිය මාර්ග අටක සන්ධිස්ථානයයි. මෙනුවර ගුවන් මාර්ගවලින් නිව්යෝක් සහ චිකාගෝ යන නගරත් මධ්‍යම සහ දකුණු ඇමෙරිකාවේ නගරත් සමඟ සම්බන්ධව පවතී.

1821 දී රතු ඉන්දියානුවරුන් විසින් ජෝජියා ජනපදයට පවරා දෙන ලද මේ ප්‍රදේශය නගරයක් වශයෙන් පිළිගන්නා ලද්දේ 1843 දීය. ඇමෙරිකානු සිවිල් යුද්ධ සමයෙහි යුද්ධ කර්මාන්තශාලා හා සම්පාදන මධ්‍යස්ථානයක් වූ ඇට්ලැන්ටා නගරය ජෝජියා ජනපදයේ අගනුවර බවට පැමිණියේ 1868 දීය. රෙදිපිළී, රසායන ද්‍රව්‍ය, පොහොර වර්ග, යකඩ හා වානේ භාණ්ඩ, ආහාර ද්‍රව්‍ය හා රසකැවිලි වර්ග සෑදීම මෙහි ප්‍රධාන නිෂ්පාදන කර්මාන්තයි. 1881, 1887, 1895 යන වර්ෂවල දී මෙහි පවත්වන ලද අන්තර්ජාතික කපු ප්‍රදර්ශන ඇට්ලැන්ටා ඉතිහාසයේ වැදගත් සිදුවීම් කීපයකි. ජනගහනය (1950) 331, 314කි.

(සංස්කරණය: 1967)