"ඇතබැස්කා" හි සංශෝධන අතර වෙනස්කම්

14:29, 9 මැයි 2025 වන විට නවතම සංශෝධනය

කැනඩාවේ මේ නමින් ගඟක් ද විලක් ද කඳු ශිඛරයක් සහ ගිරිදුර්ගයක් ද තිබේ. ඉහත දී ඇතබැස්කා නමින් දිස්ත්‍රික්කයක් ද විය. 1882 දී එය කැනඩාවේ වයඹ ප්‍රදේශයේ කොටසක් බවට පත් විය. මේ පෙදෙසෙහි විසූ ඉන්දියානු ගෝත්‍රයක් ද මෙනමින් හැඳින්විණ.

ඇතබැස්කා ගඟ

බ්‍රිතාන්‍ය කොලම්බියා-ඇල්බ'ටා පෙදෙසෙහි රොකී කඳු වැටියෙහි පිහිටි කොලම්බියා හිම කෙතින් පටන් ගන්නා මෙය මැකෙන්සි ගඟෙහි ශාඛාවකි. එය සැතපුම් 765ක් පමණ ඊසාන දෙසට ගලා ගොස් ඇත බැස්කා විලට වැටේ. වම් ඉවුරෙන් ඊට එකතු වන ලෙසර් ස්ලේව් අතු ගඟ එම නම ම ඇති විලෙන් පටන්ගනී. ඇතබැස්කා ගඟේ වැඩි කොටස ඇල්බ'ටා පළාතට අයත්ය.

ඇතබස්කා විල

වර්ග සැතපුම් 3,100ක් පමණ විශාලය. ඇල්බ’ටා සහ සස්කැචවාන් යන පළාත්වලට අයත් එය විශාලත්වය අතින් කැනඩාවේ සිව්වැනි විලයි. මුහුදු මට්ටමේ සිට අඩි 699ක් උසින් පිහිටි එහි ජලය ස්ලේව් ගඟ ඔස්සේ ග්‍රේට් ස්ලේව් විලට ද ඉන් මැකෙන්සි ගඟට ද ගලා යයි. මේ නිසා ඇතබැස්කා ගඟේ සිට ආක්ටික් සාගරය දක්වා ම යාත්‍රා කළ හැකියි. ඇතබැස්කා විල පළමුවෙන් මැන බලා සිතියම් ගත කරන ලද්දේ ෆිලිප් ට'නර් විසිනි. විල් ඉවුරෙහි පිහිටි ෆෝට්චිප්වියන් සිනිඳු ලොම් කර්මාන්ත මධ්‍යස්ථානයකි.

ඇතබැස්කා ශිඛරය

කොලම්බියා හිමකෙතට නුදුරුව පිහිටි මෙය අඩි 11,452ක් උසය. 1898 දී ජේ.ඇන්. කෝලී මෙම ශිඛරයට නැංගේය.

ඇතබැස්කා දුර්ගය

බටහිර ඇල්බ'ටාවත් නැගෙනහිර බ්‍රිතාන්‍ය කොලම්බියාවත් අතර කඳු මධ්‍යයෙහි පිහිටි මෙය මුහුදු මට්ටමේ සිට අඩි 5,736ක් උසය. මෙය 1811 දී ඩේවිඩ් තොම්ප්සන් හෝ ඔහුගේ සගයකු හෝ විසින් සොයාගනු ලැබී යයි විශ්වාස කරනු ලැබේ.

(සංස්කරණය: 1967)