"උදලු මෝරා" හි සංශෝධන අතර වෙනස්කම්

14:23, 10 නොවැම්බර් 2025 වන විට නවතම සංශෝධනය

(ස්පිර්නා සිගෙයිනා-Sphyrna Zygaena L .). උෂ්ණ ප්‍රදේශවල සෑම මුහුදක ම වාගේ මේ මෝරා දක්නට ලැබේ. ඌ අඩි 20ක් පමණ දිගට වැඩේ. උගේ ශරීරයේ උඩු පැත්ත අළුපාටට හුරු දුඹුරුපාටය; යටි පැත්ත සුදුපාටය. උගේ වරල්වල කොන් කළුපාටය.

මේ මෝරාගේ හිස පැතළි වී දෙපැත්තට ප්‍රසාරණය වී තිබේ. එබැවින් එය දෙපැති මිටියකට සමානය. හිසෙහි ප්‍රසාරණය වූ දෙපැත්තේ කෙළවරවල ඇස් දෙක පිහිටා තිබේ. ශරීරය දිගය, සිහින්ය. ශ්වාසරන්ධ්‍රයක් (spiracle) නැත. නිමීලන (nictitating) පටලයක් තිබේ. දත් තරමක් ඇල වී ඇත. ගුද වරලේ පාදය ළය වරලේ පාදයට වඩා කෙටිය.

උදලු මෝරාට මෙවැනි අස්වාභාවික හිසක් ඇතිවීමට හේතුව තවමත් නොපැහැදිලියි. බොහෝ මත්ස්‍ය විශේෂයන්ගේ කීටයන් කෙරෙහි ඇතැම් රසායන ද්‍රව්‍යයන්ගේ බලපෑම් නිසා මෙවැනි අස්වාභාවික ජීවීහු ඇති වෙත්. එහෙත් පරිණත අවස්ථාවට පැමිණෙන තුරු ඔව්හු ජීවත් නොවෙත්.

ලොකු උදලු මෝරු ඉතා දරුණුය; සටන්කාමීය. බිළි කටුවකට ඇමුණුණු විට ඌ මහ සටනක් කරමින් ගැළවෙන්නට තැත් කරයි. උදලු මෝරකු බෝට්ටුවක් හෝ ඔරුවක් දැක්ක හොත් ඌ නිසැකව ම ඊට පහර දෙයි. එහෙයින් උදලු මෝරුන් ඉතා භයානක සතුන් ලෙස නිවර්තන ප්‍රදේශවල සලකති.

උදලු මෝරා කොන්ඩ්‍රික්තියේස් (Chondrichthyes) වර්ගයෙහි එවුසලකි (Eusalachii) උපවර්ගයෙහි අස්ටෙරොස්පොන්ඩිලි (Asterospondyli) ගෝත්‍රයෙහි ස්පිර්නිඩෙ (sphyrnidae) කුලයට අයත්ය. වෙන වර්ගීකරණයක් අනුව ඌ එලස්මොබ්‍රොන්කි (බ.) (Elasmobronchii) වර්ගයෙහි ලම්නිපෝමේස් (Lamniformes) ගෝත්‍රයෙහි ස්පිර්නිඩෙ කුලයට අයත්ය.

(සංස්කරණය: 1970)