"උත්තරාජීව" හි සංශෝධන අතර වෙනස්කම්

14:40, 13 නොවැම්බර් 2025 වන විට නවතම සංශෝධනය

බුරුම රට අරිමද්දන (වර්තමාන පගාන්) නුවරින් ලක්දිව පැමිණි තෙර නමකි. අරිමද්දන නුවර රජතුමාගේ ආචාර්ය වූ උත්තරාජීව මහතෙරුන් චෛත්‍යාදිය වැඳීමට යනු කැමැතිව ඡප්පට සාමණේරයන් ඇතුළු බොහෝ භික්ෂූන් සමඟ ලක්දිවට පැමිණි බව බුරුමයේ (රාමඤ්ඤ දේශයේ) ධම්මචේතිය නම් රජුගේ කල්‍යාණි ශිලාලිපියෙහි සඳහන් වේ. තවද ලක්දිව සංඝයා වහන්සේ උන්වහන්සේගෙන් කරුණු විචාරා, දෙරට වැසි සංඝයා එක් පරම්පරාවකින් පැවත එන බැවින් එක්ව සංඝකර්ම කරම්හයි ගිවිසගෙන සියලු දෙන එක් වී ඡප්පට සාමණේරයන්ගේ උපසම්පදා කර්මය කළහයි ද එම ලිපියෙහි සඳහන් වී ඇත. මුන්වහන්සේ ලක්දිව සිද්ධස්ථානයන් වැඳ පුදාගෙන පිරිසත් සමඟ නැව් නැගී ආපසු අරිමද්දනයට වැඩම කළ නමුත් ඡප්පට තෙරණුවෝ ලක්දිව නැවතී පිටකත්‍රය හදාළහ.

පූර්වෝක්ත ශිලාලිපියෙහි සඳහන් වන්නේ උත්තරාජීව තෙරුන් මහලු පැරකුම්බා කාලයේ දී මෙහි පැමිණි බවයි. ඡප්පට නම් තෙර කෙනකුන් ඉන් අවුරුදු දෙසිය ගණනකට පසු, එනම් සවැනි පැරකුම්බා කාලයෙහි පැමිණි බව සංඛේපවණ්ණනාදියෙන් හෙළි වෙයි. මේ නිසා උත්තරාජීව තෙරුන්ගේ ශිෂ්‍ය වූ ඡප්පට තෙරණුවෝ සංඛේපවණ්ණනාදියෙහි සඳහන් වන ඡප්පට තෙරුන් නොව අන්‍ය කෙනෙකැයි සිතීමට ඉඩ තිබේ. තවද මේ දෙදෙන ම බුරුම රට අරිමද්දන පුරයෙන් පරාක්‍රමබාහු කාලයක ම පැමිණි බව සඳහන් වන බැවින් අග්ගමහා පණ්ඩිත පොල්වත්තේ බුද්ධදත්ත හිමියෝ මෙය විමසිල්ලට භාජන කරති. ඒ මෙසේයි; “මහාපරාක්‍රමබාහු රජුට ‘සිරිසංඝබෝධි’ යන ප්‍රථම විරුදනාමයක් තිබුණ බව නොපෙනේ. සවෙනි පැරකුම්බා රජුට ඒ විරුදය තිබුණ බව ඉතා ප්‍රකටය. කල්‍යාණි ශිලාලිපියෙහිත් බුරුම ශාසනවංශයෙහිත් ‘සිරිසංඝබෝධි පරාක්කමබාහු’ යයි යොදා තිබීමෙන් ඔප්පු වන්නේ සවෙනි පැරකුම්බා රජු ගැන ඔවුන් කතා කරන බවයි. නමුත් පරාක්‍රමබාහු රජුන්ගේ විශේෂ නොදත් ඒ පිටරට උගතුන් මහාවංශය බලා ප්‍රථම පරාක්‍රමබාහුගේ රාජ්‍ය වර්ෂකාලය යොදන්ට ඇත” යනුවෙනි.

උත්තරාජීව තෙරුන් මෙහි ගෙන ආහයි කියනු ලබන සද්දනීති නම් ව්‍යාකරණ ග්‍රන්ථය අග්ගවංස තෙරුණුවන් විසින් කරන ලද්දකි. ත්‍රිපිටකය පදනම් කර ගෙන රචනා කරන ලද මෙය එකල සිංහල උගතුන් විසින් පිළිගන්නා ලද්දේ මහත් හරසරිනි.

(සංස්කරණය: 1970)