"අලවතුගොඩ දේවාලය" හි සංශෝධන අතර වෙනස්කම්

11:02, 26 ජනවාරි 2024 වන විට නවතම සංශෝධනය

සමන් දේවාලයත් නිසා ප්‍රසිද්ධියට පැමිණි පැරණි සිද්ධස්ථානයකි. මෙය මහනුවර දිස්ත්‍රික්කයේ හාරිස්පත්තුව බද උඩගම්පහේ අලවතුගොඩ නම් පියසෙහි පිහිටියේය. මේ ස්ථානයෙහි මහනුවර සමයෙහි කරවූ සමන් දෙවිඳුගේ දේවාලයක් හා මෑත දී කරවන ලද කුඩා දෙමහල් විහාරමන්දිරයක් ද ඇත. මෙහි දැනට ශේෂව ඇත්තේ බෝධි වෘක්ෂය විනාශ වී ගිය විහාර ගොඩනැඟිලි ආදියෙහි ගල් කණු ස්වල්පයක් ද බොහෝ දුරට මැකීගිය ගල් සන්නසක් ද පමණි. වළගම්බාහු රජු විසින් අලවතුගොඩ පැරණි විහාරයට සන්නසක් පිදු බවත් එය 1818 දී ඇති වූ කැරැල්ලේ දී විනාශ වී ගිය බවත් ජනප්‍රවාදයෙහි එයි.

කීර්ති ශ්‍රී රාජසිංහ මහරජාණන් සමයෙහි ආරම්භ කළ මේ සමන් දේවාලයේ පෙරහර මේ තාක් වර්ෂයක් පාසා ඉතා ගරු ලෙස පවත්වනු ලැබේ. විහාරයට පුදා තුබුණු ගොඩමඩ ඉඩම් බොහෝ ගණනක් හා රාජකාරිගම් ආදිය ද දැනටත් දේවාලය සතුව පවත්නේය.

මහනුවර සමයේ දී නඩුහබ කියන්නන් දිව්රුම් දීම් ආදිය සඳහා අලවතුගොඩ දේවාලය කරා ගිය බැව් කියති.

(සංස්කරණය: 1965)